پسرور: صوبہ پنجاب کے ضلع سیالکوٹ میں لڑکی کو چھیڑنے والے نوجوانوں کی درگت بنادی گئی۔
تفصیلات کے مطابق واقعہ سیالکوٹ کی تحصیل پسرور میں پیش آیا لڑکی کے بھائی نے اے آر وائی نیوز سے گفتگو میں بتایا کہ میں بہن کو لینے اسکول گیا تو چند اوباش نوجوان اسے چھیڑ رہے تھے میں نے انہیں روکنے کی کوشش کی تو انہوں نے مجھے مارنے کی دھمکیاں دیں اور مزید ساتھیوں کو بلا لیا۔
اسی اثنا میں لڑکی کے رشتے داروں اور اہل محلہ کو خبر ہوگئی تو وہ بھی متاثرہ جگہ پہنچ گئے جس کے بعد لڑکی کو چھیڑنے والے نوجوانوں کی جیسے شامت آگئی ہو۔
لڑکی کے اہل خانہ اور اہل محلہ نے ڈنڈوں سے ان اوباش نوجوانوں کی خوب درگت بنائی اور انہیں لہولہان کردیا۔
اسی دوران لڑکی کو چھیڑنے والے اوباش نوجوانوں کے دیگر ساتھی بھی آن پہنچے اور انہوں نے لوگوں کو مشتعل کرنے کے لئے ہوائی فائرنگ بھی کی تاہم لڑکی کو چھیڑنے والے نوجوانوں کی خوب درگت بنائی گئی۔
معاملہ سنگین ہونے کے بعد پولیس بھی جائے حادثے پر پہنچی اور فوری کارروائی کرتے ہوئے چھ ملزمان کو گرفتار کیا اور ان کے خلاف مقدمہ بھی درج کرلیا۔
