بھارتی آنجہانی گلوکار سدھو موسے والا کے قتل کو دو ماہ گزر چکے ہیں اور اس حوالے سے تہلکہ خیز انکشافات کا سلسلہ جاری ہے، اب ایک اور کال کی ریکارڈنگ سامنے آئی ہے جس میں سدھو موسے والا کے قتل کی مبارک باد دی جارہی ہے۔
بھارتی میڈیا رپورٹ کے مطابق بھارتی گلوکار اور سیاست دان سدھو موسے والا کے قتل کے فوراً بعد ہونے والی ایک ٹیلی فون کال کی ریکارڈنگ سامنے آئی ہے جس سے اصل قاتل کی نشاندہی ہوتی ہے۔
رپورٹ میں دعویٰ کیا گیا ہے کہ اس میں ایک نامعلوم شخص قتل کے مبینہ ماسٹر مائنڈ لارنس بشنوئی سے بات کر رہا ہے، ایک منٹ اور 38 سیکنڈز پر مشتمل کال انڈیا ٹوڈے نے نشر بھی کی ہے۔
ٹیلی فونک گفتگو میں لارنس بشنوئی جو کہ تہاڑ جیل میں بند ہیں، نامعلوم کالر سے پوچھتے ہیں ’کیا کام ہو گیا؟‘ جس پر جواب دیا جاتا ہے ’ہاں‘۔
اس کال سے لارنس بشنوئی کے واردات کے ماسٹر مائنڈ ہونے کو تقویت ملتی ہے۔
اس سے یہ بھی واضح ہوا ہے کہ بشنوئی ٹیلی فون تک رسائی رکھتے ہیں اور جیل سے ہی اپنے گینگ کو چلا رہے ہیں۔
پنجابی میں ہونے والی اس گفتگو سے پہلے نامعلوم شخص تصدیق کرتا ہے کہ فون کا اسپیکر تو آن نہیں، اس کے بعد بشنوئی کو مبارک باد دیتا ہے۔
گفتگو میں سدھو موسے والا کو گیانی کہہ کے بلایا جاتا ہے تاہم جب بشنوئی سمجھ نہیں پاتے کہ کون گیانی تو کال کرنے والا شخص واضح طور پر بتاتا ہے کہ سدھو موسے والا کو قتل کر دیا گیا ہے۔
جیسے ہی بشنوئی یہ الفاظ سنتے ہیں اوکے کہہ کے فون کاٹ دیتے ہیں۔
یاد رہے کہ سدھو موسے والا کو 29 مئی کو لارنس بشنوئی گینگ کے رکن انکیت سرسا نے پنجاب کے ضلع مانسا میں گولی مار کر قتل کر دیا تھا، یہ قتل پنجاب حکومت کی جانب سے سدھو موسے والا کی سیکیورٹی واپس لیے جانے کے اگلے روز ہوا تھا۔
ان کی پوسٹ مارٹم رپورٹ میں بتایا گیا تھا کہ انہیں 19 گولیاں لگی تھیں اور وہ 15 منٹ کے اندر دم توڑ گئے تھے جبکہ جیپ میں موجود دو افراد زخمی ہو گئے تھے۔
