کراچی : سندھ اسمبلی آج تحلیل کر دی جائے گی ، وزیراعلیٰ سندھ مراد علی شاہ اسمبلی تحلیل کرنے کی سمری آج ہی گورنر سندھ کو ارسال کریں گے۔
تفصیلات کے مطابق سندھ اسمبلی اپنی آئینی مدت سےدوروز پہلے آج تحلیل کردی جائےگی، وزیراعلیٰ سندھ مراد علی شاہ آج ہی اسمبلی تحلیل کرنے کی سمری گورنر سندھ کو ارسال کریں گے۔
اسپیکر سندھ اسمبلی نے اسمبلی ختم ہونے سےمتعلق اراکین کو آگاہ کرتے ہوئے ہدایت کی تمام ارکان اپنی حاضری یقینی بنائیں۔
آغاسراج درانی کا کہنا ہے کہ آج آخری اجلاس ہے، جس میں الوداعی فوٹوسیشن ہوگا ، اجلاس کےبعداراکین کیلئےپرفارمنس سرٹیفکیٹ رکھے ہیں۔
دوسری جانب وزیراعلیٰ کیلئے اپوزیشن جماعتوں کی مشاورت جاری ہے ایم کیو ایم اور جی ڈی اے کی جانب سے شعیب صدیقی، یونس ڈھاگا اور ڈاکٹر صفدر عباسی کے نام فیورٹ قرار دیے جارہے ہیں۔
گذشتہ روز مشیر قانون مرتضیٰ وہاب کا کہنا تھا کہ سندھ اسمبلی کی آئینی مدت اتوار 13 اگست کو مکمل ہو رہی ہے تاہم اسمبلی قبل از وقت تحلیل کرنے کا فیصلہ کیا ہے، جس کے تحت یہ جمعہ 11 اگست کو تحلیل کر دی جائے گی۔
مرتضیٰ وہاب نے بتایا تھا کہ محکمہ قانون سمری طریقہ کار کے تحت وزیر اعلیٰ سندھ سید مراد علی شاہ کو بھیجے گا اور وہ کل اسمبلی تحلیل کرنے کی ایڈوائس گورنر سندھ کو ارسال کر دیں گے، جن کے دستخط کرتے ہی اسمبلی تحلیل ہو جائے گی۔
