کراچی: صوبہ سندھ میں اسکولوں میں 5 سے 18 سال تک کے بچوں کو پیٹ کے کیڑے مارنے کی دوا دینے کی مہم شروع کی جا رہی ہے۔
تفصیلات کے مطابق وزیر صحت سندھ ڈاکٹر عذرا پیچوہو نے بتایا ہے کہ 6 فروری سے صوبہ بھر میں بچوں کے لیے پیٹ کے کیڑے مارنے کی خصوصی مہم چلائی جائے گی۔
انھوں نے والدین سے اپیل کی ہے کہ اپنے بچوں کی صحت کی خاطر اس مہم میں حصہ لیں، جس کے تحت 5 سے 14 سال تک کی عمر کے 43 لاکھ بچوں کو اسکولوں میں دوا فراہم کی جائے گی۔
مہم کے دوران 15 سے 18 سال کی 4 لاکھ لڑکیوں کو بھی یہ خوراک فراہم کی جائے گی، وزیر صحت کا کہنا تھا کہ صحت مند ماں صحت مند معاشرہ تشکیل دیتی ہے۔
ڈاکٹر عذرا کے مطابق 2021 میں بھی بچوں میں پیٹ کے کیڑے مارنے کی مہم مکمل کی جا چکی ہے، اُس دوران 26 لاکھ بچوں میں دوا فراہم کی گئی تھی، اور اس مہم میں بہت اچھے نتائج سامنے آئے تھے۔
ڈاکٹر عذرا پیچوہو کا کہنا تھا کہ کیڑے نہ صرف پیٹ کے امراض کا سبب بنتے ہیں، بلکہ اس کی وجہ سے بچے غذا کی کمی کا بھی شکار ہوتے ہیں، اور اس سے بچوں کی صحت متاثر ہوتی ہے، وزن بھی کم ہوتا ہے۔
ماہرین صحت کا کہنا ہے کہ بچوں کو پیٹ کے کیڑے مارنے کی دوا دینا انتہائی ضروری ہے۔
