کراچی: سندھ اسمبلی میں سینیٹ کی خالی نشست پر پولنگ جاری ہے۔
تفصیلات کے مطابق سندھ اسمبلی کے ایوان میں سینیٹ کی ٹیکنو کریٹ کی نشست پر انتخاب کے لیے پولنگ جاری ہے۔
صوبہ سندھ میں سینیٹر سکندر میندھرو کے انتقال سے ٹینیکل نشست خالی ہوئی تھی، اس نشست پر 3 امیدواروں میں مقابلہ ہے، جن میں پیپلز پارٹی کی جانب سے ڈاکٹر خالدہ سکندر میندھرو، ڈاکٹر کریم خواجہ اور تحریک انصاف کی جانب سے سابق جسٹس نور الدین امیدوار ہیں۔
پولنگ آج صبح 9 بجے سے شروع ہوئی اور شام 4 بجے تک بلا تعطل جاری رہے گی۔
ووٹنگ شروع ہوتے ہی سندھ اسمبلی کے ایوان سے حنا دستگیر نے پہلا ووٹ کاسٹ کیا، صوبائی الیکشن کمشنر اعجاز انور چوہان ریٹرننگ آفیسر کے فرائض انجام دے رہے ہیں۔ الیکشن کمیشن کے سینئر افسران علی اصغر سیال، ندیم حیدر ،مسعود احمد قریشی اور محمد یوسف ان کی معاونت کر رہے ہیں۔
اب تک 10 ووٹ کاسٹ ہو چکے ہیں، ایم پی اے جام اویس گہرام بھی ووٹ ڈالنے پہنچ گئے، انھیں بکتر بند گاڑی میں اسمبلی لایا گیا، کیوں کہ وہ جیل کسٹڈی میں ہیں، ان پر ناظم جوکھیو قتل کے الزامات ہیں۔
