سنگاپور: سوشل میڈیا پر ایک ویڈیو سامنے آئی ہے جس میں ایک خوفناک اژدہا کو بجلی کی تار سے لپٹا دکھایا گیا ہے۔
یہ ویڈیو سنگاپور کے علاقے جِن لیکر کی ہے، جہاں چاؤ چو کانگ ایونیو پر لائٹننگ کے لیے لگائی گئی تار سے ایک بہت بڑا اژدہا لپٹ گیا تھا۔
ویڈیو میں دیکھا جا سکتا ہے کہ بہت سارے لوگ اژدہے کو دیکھنے کے لیے اکھٹے ہو گئے ہیں۔
رپورٹس کے مطابق 7 جنوری کو اژدہے کو کسی حادثے سے بچانے کے لیے ایکرس وائلڈ لائف ریسکیو کے اہل کاروں نے کافی دیر تک کوششیں کیں، اور اسے نیچے اتارنے کے لیے آپریشن کیا۔
تاہم، بڑی کوششوں کے بعد بھی جب اژدہا نیچے نہیں اترا تو ریسکیو ٹیم نے تار نیچے کھینچ کر سانپ کو چھڑانے کا فیصلہ کیا۔
ویڈیو میں دیکھا جا سکتا ہے کہ ریسکیو اہل کاروں نے روشنی کے لیے گلی میں لگائی گئی تار کو پہلے نیچے کھینچا اور پھر اژدہے کو اس سے علیحدہ کرنے میں کامیابی حاصل کی۔
ریسکیو اہل کاروں نے پائتھن سانپ کو آزاد کرنے کے بعد قریبی جنگل میں لے جا کر چھوڑ دیا۔
