اسلام آباد : کالعدم جماعت سپاہ صحابہ نے بھی حکومت سے پابندی ہٹانے کا مطالبہ کردیا اور کہا حکومت نے پابندی نہ ہٹائی تو احتجاج پر مجبور ہوں گے۔
تفصیلات کے مطابق ایک اور تحریک لبیک پاکستان (ٹی ایل پی ) کے بعد ایک اور کالعدم جماعت سے پابندی ہٹانے کا مطالبہ سامنے آگیا، اہلسنت والجماعت نے مطالبہ کیا ہے کہ کالعدم سپاہ صحابہ سے پابندی ہٹائی جائے۔
مرکزی صدر اہلسنّت و الجماعت پاکستان علامہ اورنگزیب فاروقی کا کہنا ہے کہ حکومت نے پابندی نہ ہٹائی تو احتجاج پر مجبور ہوں گے۔
یاد رہے گذشتہ روز وزارت داخلہ نے تحریک لبیک پر سے پابندی ہٹانے کا نوٹی فکیشن جاری کیا تھا ، نوٹی فکیشن کے مطابق تحریک لبیک کوکالعدم تنظیموں کی فہرست سے نکال دیا گیا ہے، وفاقی کابینہ کی منظوری کے بعد سمری وزارت داخلہ کوموصول ہوئی تھی جبکہ پنجاب کابینہ نے بھی تحریک لبیک کا نام کالعدم لسٹ سے نکالنے کی سفارش کی تھی۔
بعد ازاں تحریک لبیک پاکستان (ٹی ایل پی ) نے وزیر آباد سے دھرنا ختم کر نے کا اعلان کیا ، رکن مجلس شوریٰ پیر سرور شاہ کا کہنا تھا کہ تحریک لبیک نے 50فیصدمعاہدہ پوراہونےپر دھرنا ختم کیا، حکومت مقررہ مدت میں تحریک لبیک کیساتھ کیا گیا معاہدہ مکمل کرے۔
