اسپتال انتظامیہ کی غلطی کسی بڑے سانحے کا سبب بن سکتی ہے، ایسا ہی اس وقت ہوا جب اسپتال انتظامیہ کی غلط اطلاع کے سبب ایک خاندان اپنے بزرگ رکن کی موت کا سوگ مناتا رہا اور اگلے روز اسے علم ہوا کہ زندہ ہیں۔
وسطی یورپ کے ملک سلووینیا میں اس وقت عجیب وغریب صورت حال پیدا ہوگئی جب شناخت کی غلطی کے باعث ایک خاندان کسی اور کی میت کو دفن کرنے کے بعد سوگ مناتا رہا۔
سرکاری کیئر ہوم کی اس سنگین غلطی کے باعث پیدا ہونے والی صورتحال پر وزیر صحت نے مستعفی ہونے کی پیشکش کی، حکام کے مطابق جمعرات کو 2 ایک جتنی عمر کے افراد کو مشرقی سلووینیا کے قصبے زیدانی موسٹ کے ایک کیئر ہوم میں منتقل کیا گیا۔
شناخت کی غلطی کی ایک وجہ یہ بتائی گئی کہ دونوں عمر رسیدہ افراد کو ایک ہی علاقے سے کیئر ہوم لایا گیا اور دونوں وہیل چیئرز پر تھے۔
وزیر صحت دانیجل باسک لوریدان نے نیوز کانفرنس میں بتایا کہ ایک خاندان نے اپنے والد کو گزشتہ روز دفنایا اور آج معلوم ہوا کہ وہ زندہ ہیں، اسی طرح ایک اور خاندان کو معلوم ہوا کہ گزشتہ روز انتقال کے بعد دفن کیے گئے ان کے والد تھے۔
اسپتال لائے گئے بزرگ شہریوں میں سے ایک کو ڈیمنشیا کا مرض لاحق تھا جبکہ وہ گزشتہ ایک ہفتے سے صحت سے متعلق دیگر پیچیدگیوں کا بھی شکار ہوگئے تھے۔
حکام کے مطابق دونوں مریضوں میں ایک کا انتقال ہوگیا تو اسپتال نے غلط خاندان کو اطلاع دے دی، ضروری تصدیق کے بعد متعلقہ خاندان نے انتقال کرنے والے کی آخری رسومات ادا کیں۔
حکام کے مطابق اس غلطی کا علم بزرگ شہریوں کی دیکھ بھال کرنے والے کیئر ہوم کو اس وقت ہوا جب ایک مریض صحت یاب ہو کر واپس آیا اور اس کے بازو پر شناخت کے لیے ٹیگ موجود تھا۔
وزیر اعظم نے معاملے کی تحقیقات کے لیے حکم جاری کر دیا ہے۔
