لاہور: گڑھی شاہو، صدیق کالونی میں ایک گھر سے 6 فٹ سے بڑا اژدہا نکل آیا، جس سے لوگوں میں خوف و ہراس پھیل گیا۔
تفصیلات کے مطابق لاہور کے علاقے گڑھی شاہو میں صدیق کالونی کے ایک گھر سے بڑا سانپ نکل آیا، جس سے لوگ خوف زدہ ہو گئے، فوری طور پر اسپیشل اینیمل ریسکیو ٹیم کو طلب کیا گیا جس نے 6 فٹ 11 انچ لمبے اژدہے کو پکڑ لیا۔
ریسکیو ٹیم کا کہنا ہے کہ سانپ کو آج لاہور چڑیا گھر کے حوالے کیا جائے گا۔
ریسکیو ترجمان نے بتایا کہ ریسکیو 1122 کو سانپ سے متعلق ایمرجنسی کال موصول ہوئی تھی جس پر ٹیم نے پہنچ کر گھر میں موجود اژدہے (Python) کو بروقت پکڑ کر گھر والوں کو محفوظ بنایا۔
اسپیشل اینیمل ریسکیو ٹیم نے 30 منٹ میں ریسکیو آپریشن مکمل کیا اور سانپ کو قابو کیا، پیمائش کے بعد ٹیم نے بتایا کہ سانپ کی لمبائی 6 فٹ 11 انچ ہے۔
ترجمان کے مطابق 2020 میں صوبائی دارالحکومت میں اب تک 154 سانپ/اژدہے کی ایمرجنسی میں ریسکیو کور فراہم کیا گیا ہے، ریسکیو پنجاب بھر میں اب تک 1791 سانپ کی ایمرجنسی پر بروقت ریسپانس کر کے لوگوں کو احساس تحفظ فراہم کر چکی ہے۔
