کراچی : سماجی تنظیم جے ڈی سی کے سربراہ ظفر عباس نے کہا ہے کہ کراچی کے عوام کو مہنگے پھلوں اور پیشہ ور بھکاریوں کا مکمل بائیکاٹ کردینا چاہیے۔
یہ بات انہوں نے اے آر وائی ڈیجیٹل کی خصوصی رمضان نشریات میں میزبان وسیم بادامی اور اقرار الحسن سے بات چیت کرتے ہوئے کہی۔
انہوں نے کہا کہ پیشہ ور بھکاری رمضان شروع ہوتے ہی ٹرکوں، بسوں اور ٹرینوں میں بھر کر اپنے پسندیدہ ترین شہر کراچی کا رُخ کرتے ہیں، جہاں انہیں پوری امید ہوتی ہے کہ وہ خالی ہاتھ نہیں لوٹیں گے۔
ان کا کہنا تھا کہ میں نے خود ایک بھکاری فیملی کا انٹرویو کیا ہے جس میں باپ نے بیٹے کا چھری سے ہاتھ کاٹا اور خود ہی سی دیا، زخم کی حالت اتنی خوفناک تھی کہ دیکھ کر ہی کراہیت آنے لگے۔
بھکاری نے بتایا کہ یہ بچہ ہم سب سے زیادہ کماتا ہے میں ہزار روپے کماتا ہوں تو یہ دو ہزار لے کر آتا ہے، ظفر عباس نے بتایا کہ اس کی بیوی بھی مہینے 70 ہزار تک کمالیتی ہے۔ یہ تینوں مل کر ماہانہ لاکھوں روپے کمالیتے ہیں۔
انہوں نے کہا کہ افسوس سے کہنا پڑتا ہے کہ ایک ایم بی اے پاس لڑکے کو تنخواہ کی مد میں 35 سے 40 ہزار روپے ملتے ہیں اور اس مہنگائی میں وہ کہاں جائے؟ یہی وجہ ہے کہ نوجوان نسل پھر دوسرے راستے اختیار کرتی ہے۔