بجلی کے حصول کیلیے سولر سسٹم موجودہ صدی کی ایک بہترین ایجاد ہے جو نہ صرف بجلی بچانے کا باعث بھی بنتے ہیں بلکہ ماحول دوست بھی ہیں۔
گھر کی چھتوں پر کھلی فضا میں سولر پینلز نصب ہونے کے باعث ان پر دھول مٹی جمنا ایک عام اور لازمی سی بات ہے۔
اس حوالے سے کی گئی ایک نئی تحقیق سے ثابت ہوا ہے کہ دھول مٹی جمنے سے سولر پینلز کی کارکردگی بری طرح متاثر ہوسکتی ہے۔
پاکستان کے مختلف علاقوں میں کی گئی تحقیق کے نتائج پر مبنی ایک رپورٹ میں پی وی میگزین نے کہا ہے کہ دھول جمع ہونے سے سولر پینلز کی عمر اور کارکردگی دونوں پر سنگین منفی اثرات مرتب ہوتے ہیں۔
اس تحقیق میں سائنسدانوں نے ملک کے مختلف شہروں میں 40 پینلز پر مشتمل دو پی وی سسٹمز کی کارکردگی کا جائزہ لیا۔ مختلف ممالک کے محققین نے مختلف ماحول میں سولر پینلز کی کارکردگی کا بھی تجربہ کیا۔
انہوں نے کہا کہ گندے ماحول میں سولر پینلز کی کارکردگی بہت خراب ہوجاتی ہے جبکہ صاف ماحول میں بہت کم دھول کی وجہ سے سولر پینلز کی کارکردگی بہت اچھی ہوتی ہے۔
محققین کے مطابق اسلام آباد میں ماحول بہت صاف ستھرا ہے، وہاں اوسط درجہ حرارت 20.3 سینٹی گریڈ رہتا ہے۔ خشک ترین مہینوں میں بھی بارش ہوتی ہے جس سے پی وی ماڈیولز کی صفائی ہو جاتی ہے۔ اسلام آباد میں سولر پینلز سے بجلی کی پیداوار نمایاں طور پر زیادہ رہی۔
بہاولپور صحرائی علاقہ ہے وہاں موسم خشک رہتا ہے اور بارش بھی کم ہوتی ہے، گرد و غبار کے طوفان اٹھتے رہتے ہیں۔ وہاں گرد جم جانے کے باعث سولر پینلز کی کارکردگی خاصی ناقص رہی۔
