چلاس : ہسپانوی کوہ پیما دنیا کی نویں بلند ترین چوٹی نانگا پربت کو سر کرنے کی کوشش کے دوران اپنی جان سے ہاتھ دھو بیٹھا، کوہ پیماکی موت دل کا دورہ پڑنےکی وجہ سے ہوئی۔
تفصیلات کے مطابق نانگا پربت سرکرنے کی مہم کے دوران غیر ملکی کوہ پیما جان کی بازی ہارگیا، نانگا پربت بیس کیمپ نمبر 5 پر یہ حادثہ پیش آیا۔
پولیس کا کہنا تھا کہ کوہ پیماکی موت دل کا دورہ پڑنےکی وجہ سے ہوئی، جاں بحق غیر ملکی کوہ پیماکا تعلق اسپین سے ہے۔
یاد رہے جولائی میں پاک فوج کا نانگا پربت پر پھنسے کوہ پیماؤں کو نکالنے کیلئے ہائی رسک ریسکیو آپریشن کیا تھا، نانگاپربت پر کوہ پیما شہروزکاشف اورفضل علی پھنس گئے تھے۔
آئی ایس پی آر کا کہنا تھا کہ گراؤنڈ ریسکیو ٹیم کا شہروز کاشف سے 19000 فٹ پر کیمپ 2 میں رابطہ قائم ہوا ، پاکستان آرمی ایوی ایشن کے پائلٹ نے کوہ پیماؤں کو بچایا۔
آئی ایس پی آر کے مطابق دونوں کوہ پیماؤں شہروز کاشف اور فضل علی کو پاکستان آرمی ایوی ایشن کے ہیلی کاپٹر میں ریسکیو کیا گیا جو جگلوٹ کے قریب بحفاظت لینڈ کر گئے۔
