اسلام آباد : آفیشل سیکرٹ ایکٹ کےتحت قائم خصوصی عدالت نے سائفر کیس میں پی ٹی آئی رہنما اسد عمر کی ضمانت منظور کرلی اور 50 ہزار روپے مچلکے جمع کرانے کا حکم دے دیا۔
تفصیلات کے مطابق نیشل سیکرٹ ایکٹ کے تحت قائم خصوصی عدالت میں سائفر کیس میں اسد عمر کی عبوری ضمانت کی درخواست پرسماعت ہوئی۔
اسپیشل پراسیکیوٹرشاہ خاور عدالت میں پیش ہوئے اور بتایا کہ ابھی تک اسد عمر کےخلاف کوئی ثبوت نہیں ،فی الحال اسد عمر کی گرفتاری کی ضرورت نہیں ، جس پر جج ابو الحسنات ذوالقرنین نے کہا کہ میں پھر بھی بحث سنوں گا۔
ایف آئی اے پراسیکیوٹر نےاسد عمر کی گرفتاری کی ضرورت نہیں کا بیان دیتے ہوئے کہا ابھی اسد عمر کیخلاف کوئی ناقابل تردید شواہد نہیں۔
ایف آئی اے پراسیکیوٹر نے آفیشل سیکرٹ ایکٹ عدالت کو آگاہ کرتے ہوئے کہا کہ میرابیان آپ لکھ لیں اور پھر آرڈر لکھوادیں ، جس پر بابر اعوان نے شاہ خاور سے مکالمے میں کہا کہ عدالت کو اپنا کام کرنے دیں آپ بحث نہ کریں۔
آفیشل سیکرٹ ایکٹ کی خصوصی عدالت نےایف آئی اے پراسیکیوٹرکےبیان کی روشنی میں اسد عمر کی ضمانت منظور کرلی، اسدعمر کی ضمانت 50 ہزار روپے مچلکوں کے عوض کنفرم کردی گئی۔
جج ابوالحسنات ذوالقرنین نے کہا کہ ایف آئی اے کےمطابق اسدعمرکی گرفتاری مطلوب نہیں کیونکہ ان کیخلاف ثبوت نہیں، اسد عمر نے شامل تفتیش ہونےکااظہارکیالیکن پراسیکیوشن نےشامل تفتیش نہیں کیا، اگراسدعمرکی گرفتاری مطلوب ہوئی توایف آئی اے پہلے اسدعمر کو آگاہ کرےگی۔
جج نے فیصلے میں کہا کہ مجھےکوئی پریشانی نہیں، نہ کمپرومائز کروں گا، جس کا جو حق ہے میں اسے دوں گا۔
