کراچی : اسٹیٹ بینک آف پاکستان نے مانیٹری پالیسی کمیٹی کا شیڈول جاری کردیا، جس میں مالی سال کے باقی چھ ماہ کے دوران ہونے والے اجلاسوں کی تاریخوں کا اعلان کیا گیا ہے۔
اسٹیٹ بینک کے جاری کردہ اعلامیے کے مطابق مانیٹری پالیسی کمیٹی کا پہلا اجلاس 23 جنوری 2023 دوسرا اجلاس 16مارچ 2023، تیسرا اجلاس 27اپریل 2023جبکہ چوتھا اجلاس12جون 2023 کو منعقد ہوگا۔
واضح رہے کہ گزشتہ ماہ نومبر میں ہونے والے مانیٹری پالیسی کے اجلاس کے بعد اسٹیٹ بینک کی جانب سے شرح سود میں اضافے کا اعلان کیا گیا تھا۔
اعلامیے کے مطابق شرح سود 15فیصد سے بڑھا کر 16 فیصد کردی گئی تھی، اسٹیٹ بینک نے100 بیسز پوائنٹس میں اضافہ کرتے ہوئے کہا کہ مہنگائی کا دباؤ مسلسل اور توقع سے زیادہ ہے۔
مزید پڑھیں : اسٹیٹ بینک نے مانیٹری پالیسی کا اعلان کردیا
مرکزی بینک کا کہنا تھا کہ فیصلے کا مقصد بڑھتی ہوئی مہنگائی کو کنٹرول کرنا ہے، مالی استحکام کو درپیش خطرات کو قابو میں رکھنے کے لیے فیصلہ کیا گیا ہے، اس طرح زیادہ پائیدار بنیاد پر بلند نمو کی راہ ہموار کی جاسکے گی۔
