مسقط : حکومت عمان نے مملکت کے ویزوں کے اجراء کے حوالے اہم بیان جاری کیا ہے جس کے مطابق حکام نے اپنی پالیسیوں پر نظرثانی کرتے ہوئے اہم فیصلہ کیا ہے۔
تفصیلات کے مطابق رائل عمان پولیس ترجمان نے بتایا ہے کہ سلطنت عمان نے بنگلہ دیشی شہریوں کے لیے تمام زمروں کے ویزوں کا اجراء آج سے معطل کردیا ہے۔
تائمز آف عمان کی رپورٹ کے مطابق آر او پی نے سیاحتی اور وزٹ ویزوں پر عمان پہنچنے والے تارکین وطن کے لیے ویزا کی تبدیلی کی معطلی کی تصدیق کی۔
اس سے قبل وزٹ ویزے پر ملک میں داخل ہونے والے تارکین وطن اپنی حیثیت کو ملازمت کے ویزوں میں تبدیل کر سکتے تھے۔ تاہم، اب انہیں ملک سے باہر نکلنا اور ورک ویزا پر واپس آنا ہوگا۔
ایک بیان میں انہوں نے کہا کہ حکام نے کچھ خاص قسم کے ویزوں کے حصول کے لیے اپنی پالیسیوں پر نظرثانی کرتے ہوئے سلطنت میں آنے والی تمام قومیتوں کے لیے تمام اقسام کے سیاحتی اور وزٹ ویزوں کو ورک ویزوں میں تبدیل کرنے کی معطلی کا اعلان کیا ہے۔
اس کے علاوہ عمان کے ساتھ ساتھ بنگلہ دیشی شہریوں کے لیے ہر قسم کے نئے ویزوں کا اجراء منگل (31 اکتوبر 2023) سے اگلے نوٹس تک نافذ العمل ہے۔
