مظفرآباد: آزادکشمیر سپریم کورٹ نے آزادکشمیر کے سابق وزیر اعظم سردار تنویر الیاس کی نااہلی کے خلاف اپیل خارج کردی۔
سابق وزیراعظم سردارتنویر الیاس کی لیگل ٹیم نے توہین عدالت کیس میں آزادکشمیر ہائی کورٹ کی جانب سے نااہلی کے فیصلے کے خلاف پٹیشن سپریم کورٹ میں فائل کی تھی۔
آزادکشمیر سپریم کورٹ کے چیف جسٹس راجہ سعید اکرم نے سردار تنویر الیاس کے وکلا پر سخت برہمی کا اظہار کیا۔
عدالت نے کہا کہ اپیل کا ٹائٹل درست نہیں اس میں سردار تنویر الیاس کو وزیر اعظم لکھا گیا ہے، اگر وہ وزیر اعظم ہیں تو اپیل دائر کرنے کی ضرورت کیوں ہے۔
عدالت نے وزیراعظم آزاد کمشیر کو نا اہل قرار دے دیا
چیف جسٹس سعید اکرم نے وکلا سے مکالمے میں کہا کہ فیصلہ غلط یا ٹھیک ہوا اس پر فیصلہ بعد میں ہوگا، آپ دوبارہ اپیل کریں،ہم دیکھیں گے کہ آج یا کل اسے منظور کرنا ہے کہ نہیں۔
واضح رہے کہ آزادکشمیر ہائی کورٹ نے وزیراعظم آزادکشمیر تنویر الیاس کو توہین عدالت کیس میں نااہل قرار دے دیا تھا۔
عدالت نے آزادکشمیر کے وزیراعظم کو عدالت برخاست ہونے تک سزا سنائی اور انہیں کسی بھی پبلک عہدے کے لیے نااہل قرار دیا، آزادکشمیرکی تاریخ میں پہلی بار کسی وزیراعظم کو توہین عدالت پر نااہل قرار دیا گیا ہے۔
