سپریم کورٹ نے ایمپلائز اولڈ ایج بینیفٹ (ای او بی آئی) کو 6 ہفتے میں جائیدادوں کے تنازع سے متعلق فیصلہ کرنے کا حکم دیا ہے۔
اے آر وائی نیوز کے مطابق سپریم کورٹ میں ای او بی آئی کرپشن کیس کی سماعت ہوئی۔ چیف جسٹس عمر عطا بندیال کی سربراہی میں ں3 رکنی بینچ نے سماعت کی اور ای او بی آئی کو 6 ہفتے میں جائیدادوں کے تنازع سے متعلق فیصلہ کرنے کا حکم دیتے ہوئے سماعت کو اگست تک ملتوی کر دیا۔
سماعت شروع ہوئی تو وکیل مخدوم علی خان نے دلائل دیتے ہوئے کہا کہ 10 سال گزر گئے لیکن متاثرین عدالتوں میں ہی پھنسے ہوئے ہیں۔ ای او بی آئی جائیدادوں سے متعلق 10 سال میں بھی کوئی فیصلہ نہ کرسکی، اس کی جائیدادیں اور پیسے سپریم کورٹ کے پاس جمع ہیں۔
چیف جسٹس عمر عطا بندیال نے کہا کہ دس سال پہلے کے مقابلے میں آج پراپرٹی کی قیمتیں کہاں سے کہاں پہنچ گئی ہوں گی، جن کے کروڑوں پھنسے ہیں وہ بھی پاکستانی شہری ہیں، پیسوں کے معاملے پر عدالت عدم اطمینان کا شکار رہتی ہے، افسری کرنے کے بجائے انہیں بتائیں کہ حالات بدل گئے ہیں۔
چیف جسٹس نے رولنگ دیتے ہوئے کہا کہ اس مسئلے کا ای او بی آئی کو حل نکالنا ہوگا، ای او بی آئی ایک بڑا ادارہ ہے، اسے دوبارہ اپنے پاؤں پر کھڑا کریں، امید ہے ای او بی آئی دیانتداری کے ساتھ فیصلہ کرے گا، جن کے پیسے واپس کرنے ہیں واپس کریں ورنہ پراپرٹی ان کے حوالے کی جائے۔
اس موقع پر ای او بی آئی حکام نے عدالت سے مہلت طلب کی جس پر عدالت نے جائیدادوں کا تنازع 6 ہفتے میں حل کرنے کا حکم دیتے ہوئے سماعت اگست تک ملتوی کر دی۔
