سپریم کورٹ میں زیر التوا مقدمات کی تعداد میں غیر معمولی اضافہ

اسلام آباد: سپریم کورٹ آف پاکستان میں زیر التوا مقدمات کی تعداد میں غیر معمولی اضافہ ہوگیا، زیر التوا سول مقدمات کی تعداد 30 ہزار سے زائد ہے۔

تفصیلات کے مطابق سپریم کورٹ آف پاکستان میں 31 جنوری تک زیر التوا مقدمات کی رپورٹ جاری کردی گئی، زیر التوا مقدمات کی تعداد 53 ہزار 547 تک پہنچ گئی۔

سپریم کورٹ میں 16 جنوری سے 31 جنوری تک 118 مقدمات کا اضافہ ہوا۔

رپورٹ کے مطابق سپریم کورٹ میں 30 ہزار 427 سول مقدمات زیر التوا ہیں، 28 از خود نوٹسز، ایک ریفرنس اور بنیادی انسانی حقوق سے متعلق 133 درخواستیں زیر التوا ہیں۔

سپریم کورٹ میں دائر فوجداری مقدمات اور جیل پٹیشنز کی تعداد بھی 11 ہزار سے تجاوز کر گئی۔

رپورٹ کے مطابق 16 سے 31 جنوری تک لاہور، پشاور اور کوئٹہ رجسٹریز میں کوئی مقدمہ نہیں سنا گیا۔

Comments