سوئٹزرلینڈ کے صدر نے گزشتہ روز ابوظبی میں شیخ زاید بڑی جامع مسجد کا دورہ کیا۔ انہوں نے شیخ زاید کے تاریخی ورثے اور ان کے اس حکیمانہ طرز اقتدار کی تعریف کی۔
بین الاقوامی خبر رساں ادارے کی رپورٹ کے مطابق سوئٹزرلینڈ کے صدر کے ہمراہ سوئس سفیر، سوئٹزرلینڈ میں اماراتی سفیر بھی موجود تھے۔ اس موقع پر سوئس صدر شیخ زاید بن سلطان آل نہیان کے مقبرے پر بھی گئے۔
سوئٹزرلینڈ کے صدر کا اس موقع پر کہنا تھا کہ شیخ زاید نے اقوام عالم کے درمیان روا داری، امن و سلامتی اور پرامن بقائے باہم کے کلچر کے فروغ میں اہم کردار ادا کیا۔
سوئس صدر نے شیخ زاید جامع مسجد کے ہال اور بیرونی حصوں کا بھی نظارہ کیا۔ شیخ زاید جامع مسجد کے ڈائریکٹر جنرل ڈاکٹر یوسف العبیدلی ان کے ہمراہ تھے۔
جامع مسجد کے تمدنی پیغام سے متعارف کراتے ہوئے سوئس صدر کو بتایا گیا کہ روا داری، پرامن بقائے باہم اس کا اہم پیغام ہے۔
سوئس صدر کو بتایا گیا کہ شیخ زاید جامع مسجد مرکز اسلامی ثقافت کو متعارف کرانے اور اقوام عالم کے درمیان تمدنی رابطے بڑھانے کے حوالے سے اہم خدمات انجام دے رہا ہے۔
