ٹی 20 ورلڈ کپ میں 9 جون کو نیویارک میں روایتی حریفوں کے پاک بھارت ٹاکرے کا دنیا انتظار کر رہی ہے آئی سی سی نے اس حوالے سے بڑا فیصلہ کیا ہے۔
ٹی ٹوئنٹی ورلڈ کپ 2024 شروع ہونے میں صرف چند دن باقی ہیں۔ یکم جون سے امریکا اور ویسٹ انڈیز کی مشترکہ میزبانی میں میگا ایونٹ شروع ہو جائے گا جس میں پہلی بار ریکارڈ 20 ٹیمیں شرکت کر رہی ہیں تاہم دنیا بھر بالخصوص شائقین کرکٹ کو ٹورنامنٹ کے سب سے بڑے مقابلے پاک بھارت میچ کا شدت سے انتظار ہے جو 9 جون کو نیویارک کے ناساؤ کاؤنٹی کرکٹ اسٹیڈیم میں کھیلا جائے گا۔
انٹرنیشنل کرکٹ کونسل (آئی سی سی) بھی اس میچ کی اہمیت کو جانتی ہے اسی وجہ سے اس نے اس بڑے میچ کے لیے کئی ممالک میں شائقین کرکٹ کے لیے مقامی اسٹیڈیمز میں فین پارک بنانے کا فیصلہ کیا ہے۔
جن ممالک میں یہ فین پارک بنائے جائیں گے ان میں پاکستان کے علاوہ بھارت، جنوبی افریقہ، امریکا اور برطانیہ شامل ہیں۔
رپورٹ کے مطابق پاکستان میں راولپنڈی کرکٹ اسٹیڈیم میں آئی سی سی کی جانب سے فین پارک بنایا جائے گا اور بڑی اسکرین نصب کی جائے گی۔ یہاں مقامی شائقین کرکٹ نیویارک سے ہزاروں کلومیٹر دور اپنی ٹیم کے میچ کا اسٹیڈیم میں دیکھنے کا مزا لے سکیں گے۔
راولپنڈی کے علاوہ بھارت میں نئی دہلی، جنوبی افریقہ میں جوہانسبرگ، برطانیہ میں برمنگھم اور امریکا میں نیویارک کے علاوہ ٹیکساس میں فین پارک بنائے جائیں گے۔
یہ فین پارک میچ سے 90 منٹ قبل شائقین کرکٹ کے لیے کھول دیے جائیں گے اور میچ ختم ہونے کے ایک گھنٹے بعد تک یہ فین پارک کھلے رہیں گے۔
