لاہور: ٹی سی پی نے ایک لاکھ میٹرک ٹن چینی درآمد کرنے کا فیصلہ کر لیا ہے، امپورٹڈ چینی 220 روپے کلو کے حساب سے منگوائی جائے گی۔
ذرائع محکمہ خوراک کا اس حوالے سے کہنا ہے کہ محکمہ خوراک کے پاس 10 لاکھ ٹن سرپلس چینی کا ذخیرہ موجود ہے، جب کہ امپورٹڈ چینی 220 روپے کلو کے حساب سے منگوائی جا رہی ہے۔
ذرائع کے مطابق محکمہ خوراک کو سرپلس چینی کے ذخائر استعمال کرنا پڑیں گے، سرپلس چینی کے ذخائر ختم کرنے سے امپورٹڈ چینی مارکیٹ میں آ جائے گی۔
ذرائع محکمہ خوراک پنجاب کا کہنا ہے کہ شہری 100 روپے کلو سرکاری نرخ والی چینی 220 روپے کلو میں خریدنے پر مجبور ہوں گے، شہریوں کو ایک کلو چینی پر 120 روپے زیادہ ادا کرنا پڑیں گے۔
دوسری جانب واضح رہے کہ کراچی میں ایک ہی دن کے دوران فی کلو چینی کی قیمت میں ریکارڈ چھ روپے کا اضافہ ہوگیا ہے، جس کے بعد چینی کی قیمت 180 روپے پر پہنچ گئی۔
کراچی کے ہول سیل بازارمیں فی کلو چینی کی قیمت میں ریکارڈ چھ روپے کا اضافہ سامنے آیا ہے، جس کے بعد ہول سیل بازار میں ایک کلو چینی کی قیمت 165روپے جبکہ ریٹیل مارکیٹ میں 180روپے تک پہنچ گئی ہے۔
ہول سیل گروسرز ایسوی ایشن کے چیئرمین روف ابراہیم کے مطابق یکم اگست سے ابتک چینی کی فی کلو قیمت میں 21 روپے اضافہ ہوا ہے اور صرف ایک ہی دن میں ایکس مل قیمت میں بھی ایک دن میں ساڑھے پانچ روپے اور ہول سیل بازار میں چینی کی قیمت میں چھ روپے اضافہ ہوا ہے۔
