مانچسٹر: ٹیسٹ کپتان اظہر علی نے انگلینڈ کے ہاتھوں 3 وکٹوں سے شکست کے بعد ویڈیو لنک پریس کانفرنس میں کہا کہ ہماری ٹیم سلیکشن میں کوئی کمی نہیں تھی، انگلینڈ کی جیت کا سہرا کرس ووکس اور جوز بٹلر کی پارٹنر شپ کو جاتا ہے۔
اے آر وائی نیوز کے مطابق ٹیسٹ کپتان اظہر علی نے انگلینڈ کے ہاتھوں اولڈ ٹریفورڈ میں پہلے ٹیسٹ میچ میں شکست کی وجہ انگلش بیٹسمینوں کی پارٹنر شپ کو قرار دے دیا، انھوں نے پریس کانفرنس میں کہا کہ میچ ہمارے ہاتھ میں تھا لیکن پارٹنر شپ سے جیت نہیں سکے۔
اظہر علی نے کہا تیسرے روز کا آخری سیشن اور انگلینڈ کی پارٹنر شپ ٹرننگ پوائنٹ تھے، ہم ٹیسٹ میچ کو لیڈ کر رہے تھے لیکن بدقسمتی سے ہار گئے، اگلے میچ میں بھی وکٹ کو دیکھ کر ٹیم سلیکشن کریں گے۔
کپتان کا کہنا تھا کہ وہ ایک طویل عرصے سے کرکٹ کھیل رہے ہیں اور یہ بات جانتے ہیں کہ ٹیسٹ کرکٹ میں دباؤ ہوتا ہے، انھوں نے کہا ہم اس سے بہتر کھیل سکتے تھے، لیکن دوسری اننگز میں ہماری کوئی بھی پارٹنرشپ 50 سے اوپر نہیں گئی، اس سے قبل اس گراؤنڈ پر اتنا ٹارگٹ نہیں بنا، دس سال سے کرکٹ کھیل رہا ہوں جانتا ہوں کیسے چلنا ہے، جوز بٹلر نے اسپنرز کو اچھے طریقے سے کھیلا جس سے ہم پر دباؤ آیا۔
مانچسٹر ٹیسٹ : انگلینڈ نے پاکستان کو 3 وکٹوں سے شکست دے دی
اظہر علی نے کہا کہ شاداب خان کو بطور آل راؤنڈر کھلایا تھا، وہ پی ایس ایل اور ڈومیسٹک میں بھی اچھی بیٹنگ کر چکے ہیں، ٹیم سلیکشن میں کوئی کمی نہیں تھی، شاداب خان کے ہونے سے کافی سپورٹ تھی، انھوں نے ہماری امیدوں کے مطابق پرفارم کیا۔
ٹیسٹ کپتان کا کہنا تھا کہ وہ بطور بیٹسمین اپنی پرفارمنس کو دیکھتے ہیں اور کپتانی کے دوران میچ کی صورت حال کو سوچتے ہیں۔
