اپنے دانتوں کو موتی جیسا سفید اور چمکدار بنانا تو سبھی کی خواہش ہوتی ہے، اس مقصد کے لیے لوگ ہزاروں روپے خرچ کرکے ان کی صفائی بھی کرواتے ہیں مگر ناکامی کا سامنا کرنا پڑتا ہے۔
ویسے تو عمر بڑھنے کے ساتھ دانتوں کی رنگت زیادہ زرد ہونے لگتی ہے جس کی اہم وجہ اوپری سطح کا غائب ہوجانا ہے اور اس کے نیچے موجود زرد جھلی زیادہ نمایاں ہوجاتی ہے تاہم اگر یہ صورتحال جوانی میں ہی ہونے لگے تو اس پر سنجیدگی سے توجہ دینے کی ضروت ہے۔
اس حوالے سے اے آر وائی ڈیجیٹل کے مارننگ شو ’’گڈ مارننگ پاکستان‘‘ میں معروف ہربلسٹ ڈاکٹر بلقیس شیخ نے دانتوں کو موتی جیسا سفید اور چمکدار بنانے کیلئے ایک بہترین نسخہ بناکر دکھایا۔
انہوں نے کہا کہ اس نسخے کو بہت آسانی سے گھر میں ہی تیار کیا جاسکتا ہے جس کیلئے میتھی دانہ آدھا کپ اور اس میں 6 عدد لونگ شامل کرکے پاؤڈر کی طرح باریک پیس لیں اس کے بعد اس میں آدھا کپ نمک ملا لیں آپ کا منجن تیار ہے۔
ڈاکٹر بلقیس شیخ نے بتایا کہ صبح اٹھ کر اس میں سے ایک چمچ پاؤڈر نکال کر اس میں تھوڑا سا پانہ ملالیں تاکہ پیسٹ بن جائے اور اسے برش پر رکھ کر دانتوں پر اچھی مسل لیں، ایسا کرنے سے آپ کے دانتوں کے تمام داغ دھبے ایسے صاف ہوجائیں گے جیسے تھے ہی نہیں۔
