پاکستان میں دہشت گردی واقعات کی خبر پہلے را سے جڑے ’’ایکس‘‘ اکاؤنٹس پر نشر ہونے کا انکشاف ہوا ہے۔
تفصیلات کے مطابق مودی سرکار کے پاکستان میں دہشت گردی میں ملوث ہونے کے مزید شواہد سامنے آ گئے ہیں، دہشت گردانہ واقعات کی خبریں سب سے پہلے بھارتی سوشل میڈیا اکاؤنٹس پر نشر کی جاتی ہیں۔
ذرائع کے مطابق دہشت گردی کے واقعات کی خبریں نشر کرنے میں ’’ایکس‘‘ کے را سے جڑے اکاؤنٹس سرفہرست ہیں، حیران کن طور پر ان اکاؤنٹس پر دہشت گردانہ واقعات سے پہلے ہی وارننگ دے دی جاتی ہے، میانوالی ایئر بیس حملے کی اطلاع بھی ایک رات پہلے ہی را کے اکاؤنٹ نے دے دی تھی۔
حملے، کلیئرنس آپریشن کے دوران یہ اکاؤنٹس ایسی ویڈیوز نشر کرتے رہے ہیں جو دہشت گردوں کے موبائل سے بنیں، یہ پروپیگنڈا اکاؤنٹس پاکستان میں دہشت گرد حملوں کے واقعات کو بڑھا چڑھا کر بھی پیش کرتے ہیں، را کے یہ اکاؤنٹس ایک ہی جگہ اور ایک ہی آئی پی ایڈریس سے چلائے جا رہے ہیں۔
ذرائع کا کہنا ہے کہ ان اکاؤنٹس کو معلومات بدنام زمانہ بھارتی ایجنسی را پہنچاتی ہے، 26 اکتوبر کو وادی نیلم سے 5 شہریوں کے اغوا کو آپریشن کا رنگ دے کر انھی اکاؤنٹس سے نشر کیا گیا، 28 اکتوبر کو وادی تیراہ میں دہشت گرد حملے کی بھی پہلی اطلاع انھی را کے اکاؤنٹ سے دی گئی تھی، 4 اکتوبر کو ان اکاؤنٹس سے ایشیا کے دو ممالک میں جنگ کی پیش گوئی بھی کی گئی ہے۔
5 نومبر کو را کے اکاؤنٹ سے دعویٰ کیا گیا کہ پاک فوج نے کشمیر میں سول آبادی کو نشانہ بنانے کا فیصلہ کر لیا، 26 اکتوبر کو ظفروال سیکٹر میں سیز فائر خلاف ورزی کی وارننگ پہلے ہی بدنام زمانہ اکاؤنٹ پر آئی، 21 اکتوبر کو دعویٰ کیا گیا کہ 2 ہزار پاکستانی فوجی غزہ پہنچ چکے ہیں، 13 ستمبر کو اننت ناگ میں حملے کا ملبہ بھی ان اکاؤنٹس سے پاکستان پر ڈالا گیا، 6 ستمبر کو طورخم بارڈر پر فائرنگ کو ان پروپیگنڈا اکاؤنٹس نے جنگ بنا کر پیش کیا۔
مذکورہ دونوں اکاؤنٹس بے بنیاد اور من گھڑت آپریشنز کی خبریں دے کر مودی کے جنگی جنون کا ایندھن بنتے ہیں، دونوں اکاؤنٹس سے دہشت گرد حملوں کی اطلاع، تصاویر، اور ویڈیوز شیئر ہونا سوالیہ نشان ہے، تجزیہ نگاروں کا کہنا ہے کہ یہ جھوٹے، فیک ناموں کے ساتھ ایکس اکاؤنٹس مودی سرکار، را کے اوچھے ہتھیار ہیں۔
تجزیہ نگاروں کے مطابق ہندوستان دنیا میں پہلے ہی پروپیگنڈا اور ڈس انفارمیشن کا گڑھ بن چکا ہے، ای یو ڈس انفو لیب کی رپورٹس پہلے ہی ہندوستان کا مکروہ چہرہ دنیا کو دکھا چکی ہیں، را کے پروپیگنڈا اکاؤنٹس کا مقصد جھوٹ سے عوام میں ہیجان اور انتشار کو ہوا دینا ہے۔
تجزیہ نگاروں کا یہ بھی کہنا ہے کہ فیک اکاؤنٹس کو باہر بیٹھے بھگوڑے اور چند ملک میں بیٹھے عناصر مذموم مقاصد کے لیے استعمال کرتے ہیں۔
