لندن: سنگاپور کے چانگی ایئرپورٹ نے مسلسل آٹھویں سال دنیا کے بہترین ایئرپورٹ کا اعزاز برقرار رکھا ہے۔
دنیا کی سب سے اونچی ایئرپورٹ سلائیڈ، 24 گھنٹے مفت سنیما، چھت پر سوئمنگ پول اور خوبصورت بٹرفلائی پارک کی بدولت سنگاپور کے چانگی ایئرپورٹ نے مسلسل اٹھویں سال بہترین ایئرپورٹ کا اعزاز اپنے نام کیا ہے۔
فضائی پروازوں اور ایئرپورٹس پر نظر رکھنے والے برطانوی ادارے ‘اسکائی ٹریکس’ نے 2020 کے سالانہ ایوارڈ میں امسال بھی سروے کے بعد چانگی ایئرپورٹ کو سرفہرست قرار دیا ہے۔
سالانہ ایوارڈ کے لیے اسکائی ٹریکس نے عالمی سطح پر ایئرپورٹس کے حوالے سے فضائی مسافروں سے سروے کیے جس کے نتائج کا اعلان یکم اپریل کو ہونے والے سالانہ ایوارڈ تقریب میں کیا جانا تھا۔
تاہم کورونا وائرس کے باعث اس تقریب کو منسوخ کردیا گیا اور یوٹیوب پر ورچول تقریب کے ذریعے اسے براہ راست نشر کر کے سالانہ ایوارڈز کا اعلان کیا۔
سروے کے بعد دنیا کے 10 بہترین ایئرپورٹس قرار پانے والوں میں چانگی ہوائی اڈاہ ٹاپ پر ہے جب کہ ٹوکیو کا ہنیدا ایئرپورٹ دوسرے اور قطر کا حماد انٹرنیشنل ایئرپورٹ تیسرے نمبر پر رہا۔
اس درجہ بندی میں چوتھے نمبر پر جنوبی کوریا کا انچوئن ایئرپورٹ ہے، جرمنی کا میونخ ایئرپورٹ پانچویں، ہانگ کانگ انٹرنیشنل ایئرپورٹ چھٹے، ٹوکیوں کا ناریتا ایئرپورٹ ساتویں، جاپان کا چوبو سنٹریر آٹھویں، ایمسٹرڈیم ایئرپورٹ نویں جاپان اوسکا کا کانسائی ایئرپورٹ دسویں نمبر پر ہے۔
یہ سروے دنیا بھر کے 100 سے زائد ممالک کے مسافروں کی رائے پر مشتمل ہے جس میں ستمبر2019 سے فروری 2020 تک کے دوران 550 ایئرپورٹس سے متعلق رائے لی گئی تھی۔
