کراچی: محکمہ موسمیات نے آج ملک بھر میں گرج چمک کے ساتھ بارش کی پیشگوئی کی ہے۔
تفصیلات کے مطابق آج پیر کو ملک میں کہیں ہلکی تو کہیں آندھی اور گرج چمک کے ساتھ بارش کا امکان ہے، دوسری طرف پنجاب اور بلوچستان کے مختلف شہروں میں موسلا دھار بارشوں نے قیامت ڈھا دی ہے۔
محکمہ موسمیات نے آئندہ چوبیس گھنٹوں کے دوران کوئٹہ، زیارت، ژوب، بارکھان، کوہلو، قلات، خضدار، لاہور، میانوالی، سرگودھا، فیصل آباد، حافظ آباد، راولپنڈی، اسلام آباد، پشاور، مردان، صوابی، نوشہرہ، کرم، بنوں، کشمیر اور گلگت بلستان میں کہیں ہلکی تو کہیں تیز بارش کی پیشگوئی کی ہے، جب کہ کراچی کے ساحلی علاقوں میں بوندا باندی متوقع ہے۔
ادھر پنجاب اور بلوچستان کے مختلف شہروں میں موسلا دھار بارشوں نے قیامت ڈھا دی ہے، شیخوپورہ، نارووال، پسرور اور ڈسکہ کے مختلف علاقوں میں آسمانی بجلی گرنے سے 13 افراد جاں بحق، 2 خواتین سمیت 7 افراد زخمی ہو گئے ہیں، بلوچستان کےعلاقے دُکی میں بھی ایک بچہ چل بسا۔
لاہور سمیت پنجاب کے کئی شہروں میں وقفے وقفے سے بارش جاری ہے، قلات، بارکھان اور کوہلو میں بارش کے بعد مختلف علاقوں میں سیلابی صورت حال ہے، زیارت میں ژالہ باری ہو رہی ہے۔
مظفر آباد شہر اور گرد و نواح میں ہلکی بارش ہوئی، پشاور، بنوں اور کرک میں بھی موسلا دھار بارش ہوئی، موسمیات نے 30 جون تک ملک بھر میں بارشوں کی پیشگوئی کر دی ہے، اور شہری علاقوں میں اربن فلڈنگ کا خدشہ بھی ظاہر کیا گیا ہے۔
