بیجنگ: چین کی سوشل میڈیا کمپنی ٹک ٹاک نے اپنے صارفین کی دیرینہ خواہش پوری کرنے کا فیصلہ کرلیا۔
ٹیکنالوجی پر نظر رکھنے والے صحافی کے مطابق ٹک ٹاک نے ویڈیو کے دورانیے کو مزید بڑھانے کا فیصلہ کیا ہے، جس کو تمام صارفین جلد استعمال کرسکیں گے۔
ٹک ٹاک کی جانب سے ویڈیو کا دورانیہ10 منٹ تک کا کردیا جائے گا، کمپنی نے اس فیچر کا تجربہ شروع کردیا ہے، جسے مخصوص صارفین استعمال کررہے ہیں۔
یاد رہے کہ ٹک ٹاک نے گزشتہ برس دسمبر میں ویڈیو کا دورانیہ دو سے تین منٹ تک بڑھا دیا تھا، اس کے بعد ویڈیو کے دوراینے کو مزید بڑھایا گیا، اسی لیے چند مخصوص صارفین کو رواں سال جولائی کے بعد پانچ منٹ تک کے دورانیے کی ویڈیو شیئر کرنے کی سہولت بھی حاصل ہوئی۔
EVEN LONGER: TikTok also appears to be testing a 10 minute max upload limit! 👀👇 https://t.co/oAaHbB9304 https://t.co/wDIoHJdOCl
— Matt Navarra (@MattNavarra) August 25, 2021
کمپنی کی جانب سے فی الحال اس فیچر کے حوالے سے کوئی تفصیلات جاری نہیں کی گئیں اور نہ ہی اسے متعارف کرانے کی تاریخ کا کوئی حتمی اعلان کیا گیا ہے۔
واضح رہے کہ اوائل میں ٹک ٹاک پر صرف تیس سیکنڈ کی ویڈیو شیئر کرنے کی سہولت تھی، اسی وجہ سے ٹک ٹاک نے بہت کم عرصے میں صارفین کی توجہ حاصل کرلی تھی۔
