کراچی: شہر قائد کے علاقے عوامی کالونی کے تھانے میں ’ایکشن‘ دکھانے والے ٹک ٹاکرز کو اے آر وائی نیوز کی خبر پر گرفتار کر لیا گیا۔
تفصیلات کے مطابق عوامی کالونی پولیس اسٹیشن میں اسلحے کے ساتھ ٹک ٹاک ویڈیوز بنا کر اپ لوڈ کرنے والے 2 ٹک ٹاکرز نے قانون کی دھجیاں اڑا دی تھیں، جس پر انھیں گرفتار کر لیا گیا ہے۔
ایس ایس پی کورنگی ساجد امیر سدوزئی نے اے آر وائی نیوز کی خبر پر فوری ایکشن لیا، اور متعلقہ تھانے کے ایس ایچ او کو ٹک ٹاکرز اور ساتھ بیٹھے اہل کار کے خلاف فوری کارروائی کا حکم دیا۔
ایس ایچ او تھانہ عوامی کالونی جمال لغاری نے ایس ایس پی کے حکم پر بلال اور کاشف نامی ٹک ٹاکرز کو گرفتار کر کے ان کے خلاف ایف آئی آر بھی درج کر لی ہے۔
ٹک ٹاکرز نے پولیس تھانے میں قانون کی دھجیاں اڑا دیں
پولیس حکام کے مطابق ٹک ٹاکر بلال اور کاشف کو کے ایریا مارکیٹ کے علاقے سے گرفتار کیا گیا، ویڈیوز میں ساتھ بیٹھے پولیس اہل کار کے خلاف محکمہ جاتی کارروائی بھی عمل میں لائی جا رہی ہے۔
ویڈیوز میں دیکھا جا سکتا ہے کہ بلال نامی شخص تھانہ عوامی کالونی میں ایس ایچ او کے کمرے میں داخل ہوا، دونوں نے ٹک ٹاک ویڈیوز بنا کر سوشل میڈیا پر واٸرل کیں۔
