ٹوکیو : پاکستان کا آخری کھلاڑی ٹوکیو اولمپکس میں میڈل کی امید بن گیا، نیزہ بازی میں ایتھلیٹ ارشد ندیم فائنل میں پہنچنے والے پہلے پاکستانی کھلاڑی بن گئے۔
تفصیلات کے مطابق پاکستانی ایتھلیٹ ارشد ندیم نے ٹوکیو اولمپکس میں جیولین تھرو مقابلوں کے فائنل کیلئے کوالیفائی کرلیا، یہ تھی کھڈمنڈو کی وہ تھرو جو ارشد ندیم کو ٹوکیو اولمپکس میں براہ راست پہنچا گئی۔
ساؤتھ ایشین گیمز کا نیا ریکارڈ قائم کرکے ارشد اب ٹوکیو میں تاریخ بنانے سے ایک قدم دور ہیں، میاں چنوں کے چھوٹے سے گاؤں سے تعلق رکھنے والے ارشد ندیم نے ٹوکیو میں بھی ایسا نیزہ پھینکا کہ اچھے اچھوں کی چھٹی ہوگئی۔
جولین تھرو کے کوالی فیکشن راؤنڈ کی دوسری باری میں پچیاسی اعشاریہ ایک چھ کی تھرو کرکے وہ ایتھلیٹکس کے فائنل میں پہنچنے والے پہلے پاکستان بن گئے، گروپ بی میں ارشد ٹاپ پر رہے۔
ٹوکیو اولمپکس میں پاکستان کے نو ایتھلیٹس ناکام ہوچکے ہیں۔ ارشداب میڈل کیلئے آخری امید ہیں، میڈل کیلئےجنگ ہفتے کو ہوگی۔
