The news is by your side.

Advertisement

مددگار 15 کے اہل کار کا ذہنی معذور پر انسانیت سوز تشدد (ویڈیو کمزور دل افراد نہ دیکھیں)

کراچی: شہر قائد کے ایک علاقے میں مددگار 15 کے اہل کار کے ہاتھوں ایک ذہنی معذور شہری کو انسانیت سوز تشدد کا شکار ہونا پڑا، اس دردناک واقعے کی ویڈیو بھی سامنے آئی ہے، جسے دیکھ کر دل کانپ اٹھتا ہے۔

تفصیلات کے مطابق کورنگی صنعتی ایریا میں ایک پولیس اہل کار نے ذہنی معذور شہری پر بدترین تشدد کیا، پولیس اہل کار نعمان مددگار 15 پر تعینات تھا، واقعے پر ایس ایس پی کورنگی نے ایکشن لیتے ہوئے تشدد میں ملوث پولیس اہل کار کو گرفتار کر لیا ہے۔

ایس ایس پی کورنگی کے مطابق پولیس اہل کار نعمان کے خلاف متاثرہ شخص کے بھائی خالد کی مدعیت میں مقدمہ درج کر دیا گیا ہے، ترجمان کراچی پولیس نے بتایا کہ پولیس اہل کار نعمان کے خلاف مقدمہ الزام نمبر 2022/192 بہ جرم 324 درج کر کے اہل کار کو لاک اپ کر دیا گیا ہے۔

ایس ایس پی کورنگی نے کہا کہ قانون سے کوئی بالا تر نہیں اور میرے ضلع میں جو بھی غلط کام کرے گا اس کی سزا ملے گی۔

ترجمان کراچی پولیس کے مطابق رات کے وقت 15 مددگار پر کالر نعیم خان نے اطلاع دی کہ ایک بیٹری چور پکڑا گیا ہے، جب مددگار 15 کی پولیس موبائل موقع پر پہنچی تو ایک سپاہی کو پکڑے ہوئے شخص پر تشدد کرتا ہوا پایا گیا، معلوم ہوا کہ وہ شخص ذہنی معذور ہے۔

معاملہ سامنے آنے پر ایس ایس پی کورنگی نے فوری ایکشن لے لیا، انکوائری میں ملوث پائے جانے پر پولیس اہل کار کے خلاف قانونی کارروائی کرتے ہوئے مقدمہ نمبر 192/2022 تھانہ کورنگی انڈسٹریل ایریا میں درج کر لیا گیا۔

پولیس ترجمان نے بتایا کہ پولیس اہل کار نعمان کے خلاف محکمہ جاتی کارروائی بھی عمل میں لائی جا رہی ہے، جب کہ حراست میں لیے گئے متاثرہ شخص محمد عامر کو اس کے ورثا کے حوالے کر دیا گیا ہے۔

ایس ایس پی کورنگی نے متنبہ کیا کہ کسی بھی پولیس اہل کار کے خلاف ضابطہ اخلاق کی خلاف ورزی کی شکایت موصول ہونے پر سخت قانونی و محکمہ جاتی کارروائی عمل میں لائی جائے گی۔

Comments

یہ بھی پڑھیں