اسلام آباد ہائی کورٹ نے چیئرمین پی ٹی آئی کی توشہ خانہ کیس سے متعلق درخواستوں پر تحریری فیصلہ جاری کردیا،
اسلام آباد ہائی کورٹ کے چیف جسٹس عامر فاروق نے تحریری فیصلہ جاری کیا ہے، فیصلے میں کہا گیا ہے کہ درخواست گزار کے مطابق سیشن کورٹ میں کیس قابل سماعت ہونے پردلائل نہیں سنے گئے۔
سیشن عدالت نے درخواست گزار کو سنے بغیر توشہ خانہ کیس کو قابل سماعت قرار دے دیا تھا، درخواست گزار نے قابل سماعت ہونے یا نہ ہونے کا معاملہ دوسری عدالت منتقلی کی بھی استدعا کی۔
درخواست گزار کے مطابق سیشن عدالت نے قابل سماعت قرار دے کر اپنا مائنڈ ظاہر کردیا ہے، فیصلہ
کیس سے متعلق مائنڈ ظاہر کرنا کسی جج سے اس کی دوبارہ سماعت کرنے کا اختیار چھین نہیں لیتا، سیشن عدالت فیصلے کے مطابق درخواست گزار کو دلائل کیلئے متعدد مواقع فراہم کیے گئے۔
درخواست گزار کے وکلاء نے دلائل نہ دیے، اس لیے انہیں سنے بغیر فیصلہ کیا گیا، درخواست گزار یہ کہنے پر بجا ہیں کہ انہیں سنے بغیر فیصلہ ہوا لہٰذا اس کو دوبارہ سیشن عدالت بھیجا جائے۔
ضروری نہیں کہ اس معاملے کو کسی دوسرے جج کو منتقل کیا جائے، قابل سماعت سے متعلق معاملہ دوبارہ اسی سیشن عدالت کو بھیجا جاتا ہے، سیشن عدالت دونوں فریقین کے تازہ دلائل سننے کے بعد قابل سماعت سے متعلق فیصلہ کرے۔
