نئی دہلی : مودی حکومت کی ناقص پالیسیوں کیخلاف صرف کسان برادری ہی نہیں بلکہ ملک بھر کے تاجر اور ٹرانسپورٹرز بھی سراپا احتجاج ہیں جنہوں نے پورے ملک میں پہیہ جام ہڑتال کا اعلان کیا ہے۔
غیر ملکی خبر رساں ادارے کی رپورٹ کے مطابق مودی سرکار میں جنرل سیلز ٹیکس (جی ایس ٹی) پیٹرول اور ڈیزل کی بڑھتی ہوئی قیمتوں سمیت دیگر اقدامات کیخلاف آج بھارت میں مکمل ہڑتال کا اعلان کیا گیا ہے۔
ذرائع کے مطابق ملک بھر کی تقریباً 40 ہزار تاجر تنظیموں اور ٹرانسپورٹرز نے اس ہڑتال کی بھرپور حمایت کا اعلان کیا ہے۔ اس دوران مارکیٹیں اور پبلک ٹرانسپورٹ مکمل بند رہیں گی۔
آل انڈیا ٹرانسپورٹرز ویلفیئر ایسوسی ایشن نے عوام سے اپیل کی ہے کہ وہ صبح 6 بجے سے رات 8 بجے تک تمام ٹرانسپورٹ اور کاروبار بند رکھیں۔ ایسوسی ایشن نے پیٹرول اور ڈیزل کی بڑھتی قیمتوں سے متعلق اس ہڑتال کا اعلان کیا ہے۔
یہ پہیہ جام ہڑتال آج جمعہ کی صبح 6 بجے سے شام 8 بجے تک رہے گی۔ ایسی صورتحال میں اس ہڑتال کا اثر پورے ملک میں کیا ہوگا، اس کا فیصلہ آج ہوگا۔
