لاہور: سانحہ 9 مئی کے دل سوز واقعے کو ایک ماہ مکمل ہوگیا اس موقع پر میجر علی سلمان شہید کے والدین نے درد بھرا پیغام دیا ہے۔
تفصیلات کے مطابق یوم سیاہ سے اب تک گزرنے والا ایک مہینہ شہدا کے گھرانے پر قہر بن کر ٹوٹا ہے اس موقع پر شہدا کے والدین نے اپنے دکھ درد کا اظہار کیا۔
شہید میجر علی سلمان کی والدہ نے کہا کہ جب بیٹے چلے جائیں تو ماؤں کی دنیا ختم ہو جاتی ہے، ہر ماں کی خواہش ہوتی ہے مائیں اس دنیا سے اپنے بیٹوں کے ہاتھوں سے رخصت ہو، میری تو ساری کائنات وہی تھا۔
میجر علی سلمان شہید کی والدہ نے کہا کہ میرا دوست میرا بھائی بھی تھا اسے بہت یاد کرتی ہوں، میں نے تو کبھی اپنے بیٹےکو جی بھر کر دیکھا بھی نہیں، اتنا کچھ کہنا چاہتی تھی لیکن کہہ نہ سکی۔
شہید کی والدہ نے کہا کہ سلمان کا بچپن بہت اچھا تھا بہت پر خلوص اور محبت کرنے والا تھا، سب کےساتھ اچھی طرح طریقے سے بات کرنے والا تھا جو واقعہ پیش آیا بہت تکلیف ہے ایسا واقعہ نہیں ہونا چاہیے تھا۔
میجر علی سلمان شہید کی والدہ نے کہا کہ کرنل شیر خان کون ہیں اور ان کی بہادری پر ہم تو کیا انڈیا نے بھی ہمیں کہا کہ ایسا دلیر کبھی نہیں دیکھا، آپ کسی بھی شہیدکو دیکھ لیں سب نے اس ملک کیلئے خون بہایا، کیا ہم اس خون کا مان رکھ رہے ہیں نہیں بالکل بھی نہیں۔
میجر علی سلمان شہید کے والد نے کہا کہ اپنے گھر کو خود جلا رہے ہیں ہم نے اس قوم کی بے حرمتی کی ہے، جو اس سانحہ کو لائحہ عمل میں لانے میں شامل ہیں انکو سخت سزا ملنی چاہیے۔
والدین نے کہا کہ باقی لوگوں کے لئے عبرت کا نشان بنانا چاہیے، 9 مئی کے واقعات سے ہمارے جذبات مجروح ہوئے، جب ہم نے ٹی وی پر یہ بےحرمتی ہوتی ہوئی دیکھی تو ہم زارو قطار روپڑے، ہم اپنے جذبات پر قابو نہیں پا سکے، جو شہید ہوتا ہے وہ اکیلا نہیں ہوتا پورا خاندان اس کے ساتھ جاتا ہے۔
شہید میجر سلمان کے والدین نے کہا کہ ہمارے دلوں کو ٹھیس پہنچی ہے، جنہوں نے بھی یہ گھناؤناکام کیا ہے ان کو ضرور سزا ملنی چاہیے۔
