سیئول: آئی فون کے صارفین کو راغب کرنے کے لئے سام سنگ کا نیا حربہ سامنے آیا ہے۔
میڈیا رپورٹ کے مطابق سام سنگ نے ’ٹرائی گیلکسی‘ کے نام سے نئی ایپ تیار کی ہے اس ایپ کو انسٹال کرنے کے بعد ‘آئی فون’ صارفین گیلکسی ایس ٹوئنٹی تھری ڈسپلے اور یوزرانٹرفیس استعمال کرسکیں گے جس سے مجازی طور پر گیلکسی ایس 23، گیلکسی زیڈ فلپ فور، اور گیلکسی زیڈ فولڈ فور کا تجربہ حاصل کیا جاسکتا ہے۔
کمپنی کے مطابق ’ٹرائی گیلکسی‘ ایپ ٹیوٹوریئل اور ہدایات بھی فراہم کرتی ہے تاکہ آئی فون کے صارفین اس سے استفادہ کرسکیں، مگر تجزیہ کاروں کے مطابق آپ کو جلد ہی احساس ہوجاتا ہے کہ آپ اپنا فون اس کے اصل سافٹ ویئر کی بجائے ویب ایپ سے چلارہے ہیں۔
دوسری جانب سام سنگ کیمرے کی بعض سہولیات اور آبجیکٹ اریزر کو بھی استعمال کیا جاسکتا ہے جو عین گوگل اریزر کی طرح کام کرتے ہوئے تصویر کو فالتو اجزا سے پاک کرتا ہے۔
