جامشورو ایم نائن موٹروے پر ٹرک کار پر الٹ گیا جس کے نتیجے میں خاتون جاں بحق ہوگئی جبکہ حادثے میں 4 افراد زخمی ہوگئے۔
اے آر وائی نیوز کے مطابق افسوسناک واقعہ کار حیدرآباد سے کراچی جانے والی شاہراہ پر ناہموار سڑک کے باعث پیش آیا، کار سوار افراد میرپورخاص سے کراچی آرہے تھے۔
حادثے میں جاں بحق خاتون کی شناخت 50 سالہ تنسیم کے نام سے ہوئی جبکہ زخمیوں میں 25 سالہ علیزہ، 24 سالہ نعیمہ، عبدالمعیز، عبدالمعید، شامل ہیں۔
ریسکیو ذرائع کا بتانا ہے کہ واقعے میں کار سوار خاتون اسپتال لے جاتے ہوئے راستے میں دم توڑ گئیں، زخمیوں کی حالت تشویش ناک بتائی جارہی ہے۔
مزید پڑھیں: جامشورو میں خوفناک حادثہ، 10 افراد جاں بحق
جائے حادثہ پر امدادی کارروائیاں مکمل کرلی گئی ہیں جائے حادثے سے ٹرک کو کرین کی مدد سے ہٹایا گیا۔
واضح رہے کہ دو ماہ قبل جامشورو میں انڈس ہائی وے تھوڑی پھاٹک کے قریب کوچ اور ٹرک میں خوفناک تصادم ہوا تھا جس کے نتیجے میں 10 افراد جاں بحق ہوگئے تھے۔
یادرہے کہ انڈس ہائی وے سہون سے جامشورو تک انتہائی خراب حالت میں موجود ہے جہاں آئے روز حادثات رونما ہوتے رہتے ہیں، مذکورہ شاہراہ کی تعمیر ومرمت کا کام 5 سالوں سے جاری ہے تاہم آج تک مکمل نہیں ہوسکا ہے۔
