واشنگٹن: امریکی صدر ڈونلڈ ٹرمپ نے کرونا وائرس کے پیش نظر ملک بھر میں ایمرجنسی نافذ کرنے کا اعلان کردیا۔
بین الاقوامی میڈیا رپورٹ کے مطابق واشنگٹن میں میڈیا سے گفتگو کرتے ہوئے ٹرمپ کا کہنا تھا کہ ہم نے تمام سرحدیں بند کریں اور وائرس پر قابو پانے کے لیے اقدامات شروع کردیے ہیں۔
اُن کا کہنا تھا کہ یورپ سے امریکا آنے والوں کے داخلے پر پابندی عائد کردی گئی، امریکی شہری اسکریننگ کے بعد ہی ملک میں واپس آسکتے ہیں، اسی طرح تمام اسپتالوں میں ایمرجنسی نافذ کر کے ڈاکٹرز کو حکمت عملی مرتب کرنے کی ہدایت کردی۔
مزید پڑھیں: ایوانکا ٹرمپ سے ملاقات کے بعد آسٹریلوی وزیر میں کرونا وائرس کی تصدیق
یہ بھی پڑھیں: کروناوائرس: امریکا کی آدھی آبادی خطرے میں
ٹرمپ کا کہنا تھا کہ ہم کرونا ٹیسٹ کرانے کا بڑا انتظام کرنے جارہے ہیں، امریکا جلد ہی ڈرائیو تھرو ٹیسٹ کی سہولیات بھی فراہم کرے گا۔
قبل ازیں امریکی صدر نے تصدیق کی تھی کہ امریکا میں کرونا وائرس سے مرنے والوں کی تعداد چالیس تک پہنچ گئی جبکہ آج بھی مزید کیسز رپورٹ ہوئے۔
یاد رہے کہ چین نے الزام عائد کیا تھا کہ ووہان شہر میں کرونا وائرس امریکی فوجیوں کی وجہ سے پھیلا ہے۔ بعد ازاں وائٹ ہاؤس انتظامیہ نے اس دعوے کو بے بنیاد قرار دیا۔