اسلام آباد: وزیراعظم عمران خان نے کہا ہے کہ امریکی تعاون معاشی بحران اور وبا سے نمٹنے میں مدد دے گا،کروناوائرس پاکستان سمیت دنیا کے لیے ایک بڑا چیلنج ہے۔
تفصیلات کے مطابق وزیرا عظم عمران خان اور امریکی صدر ڈونلڈ ٹرمپ کے درمیان ٹیلی فونک رابطہ ہوا اس دوران دونوں رہنماؤں نےکرونا وبا کے چیلنجز سے نمٹنے کے لیے تبادلہ خیال کیا۔
ٹیلی فونک رابطے میں عالمی معیشت اور اس کے اثرات سے بچاؤ کے طریقوں پر گفتگو ہوئی۔ دونوں رہنماؤں نے پاک امریکا تعلقات کو مزید مضبوط کرنے پر بات چیت کی۔ وزیر اعظم عمران خان نے امریکا میں کرونا سے ہلاکتوں پر افسوس کا اظہار کیا۔ ٹرمپ کو پاکستان میں کرونا کا پھیلاؤ روکنے کی کوششوں سے آگاہ کیا گیا۔
اس موقع پر وزیراعظم کا کہنا تھا کہ پاکستان کو موجودہ حالات میں دوہرے چیلنج کا سامنا ہے، ایک طرف کرونا کا پھیلاؤ روکنے کا چیلنج درپیش ہے، دوسری طرف لاک ڈاؤن میں لوگوں کو بھوک سے بچانے کا چیلنج بھی ہے۔
کروناوائرس: ’امریکا کی پاکستان کیلئے 80 لاکھ ڈالر سے زائد کی نئی امداد‘
انہوں نے کہا کہ پاکستان نے صورت حال سے نمٹنے کے لیے 8ارب ڈالر کا پیکج دیا ہے، آئی ایم ایف اور دوسرے فورم پر ڈونلڈ ٹرمپ کے تعاون پر شکریہ ادا کرتے ہیں، امریکی تعاون معاشی بحران اور وبا سے نمٹنے میں مدد دے گا۔
عمران خان نے مطالبہ کیا کہ ترقی پذیر ملکوں کے قرضوں کی ادائیگی میں ریلیف کے لیے عالمی اقدامات کیےجائیں، خطے میں امن و استحکام افغانستان میں سیاسی عمل کے لیے اہم ہے۔
اس اہم گفتگو کے دوران افغانستان امن عمل میں پاکستان کے تعاون کے عزم کا اعادہ کیا گیا۔ ٹرمپ نے وزیراعظم کے کرونا ٹیسٹ کے لیے ریپڈ ٹیسٹنگ مشین بھیجنے کی پیشکش کی جس پر وزیر اعظم نے شکریہ ادا کیا۔
