اسلام آباد : ٹی ٹی پی گوہر گروپ کے دہشت گرد سیکیورٹی اداروں کے آگے ہتھیار ڈالنے پر آمادہ ہوگئے اور مقامی عمائدین سے اپنے سرنڈر کیلئے امداد کے خواہاں ہیں۔
تفصیلات کے مطابق دہشت گردوں کیخلاف سیکیورٹی فورسزکی کارروائیوں کے ثمرات سامنے آنے لگے ، ٹی ٹی پی گوہر گروپ کے دہشت گرد سیکیورٹی اداروں کے آگے ہتھیار ڈالنے پر مجبور ہوگئے۔
دہشت گرد سرغنہ حمیداللہ عرف گوہر بھی قانون نافذ کرنیوالے اداروں کے آگے سرنڈر ہونے پر تیار ہوگئے ہیں۔
ٹی ٹی پی گوہر گروپ اندرونی ٹوٹ پھوٹ کا شکار ہے ، غیراخلاقی سرگرمیوں کےباعث دہشت گرد گوہر اپنے ماتحت دہشت گردوں کا اعتماد کھو بیٹھا ہے۔
بڑھتی ہلاکتوں، مالی مسائل،اندرونی اختلافات کے باعث گوہر گروپ کے مزید دہشتگرد ہتھیار ڈالنے پر آمادہ ہوگئے ، دہشت گرد گوہر نے محسود دہشتگردوں خصوصاً شفیر اللہ گروپ پر اس کو بدنام اور قتل کی سازش کاالزام عائد کیا۔
دہشت گرد گوہر مقامی عمائدین سے اپنے سرنڈر کیلئے امداد کے خواہاں ہیں جبکہ سیکیورٹی ادارے شب و روز کاوشوں سےدہشتگردوں کو نیست و نابود کرنےکیلئے پُر عزم ہیں۔
