The news is by your side.

Advertisement

دبئی، خوفناک ٹریفک حادثہ، 2 طالب علم ہلاک

دبئی: متحدہ عرب امارات کی ریاست دبئی کے جبل علی روڈ پر کرسمس کی صبح ہولناک تصادم کے نتیجے میں 2 طالب علم زندگی کی بازی ہار گئے۔

غیرملکی خبررساں ادارے کی رپورٹ کے مطابق دبئی کے علاقے جبل علی میں کرسمس کی صبح ہولناک حادثے کے نتیجے میں 2 بھارتی طالب علم ہلاک ہوگئے، جن کی شناخت 19 سالہ روہیت کرشنا کمار اور 21 سالہ شرت کمار کے ناموں سے ہوئی ہے۔

رپورٹ کے مطابق دونوں دوست لندن اور امریکا کی یونیورسٹیز میں زیر تعلیم تھے اور کرسمس کی چھٹیاں گزارنے کے لیے دبئی پہنچے تھے۔

دونوں کے دوست کا کہنا ہے کہ حادثہ جبلی علی میں رات 3 بجے رہائشی علاقے کے گارڈن کے قریب پیش آیا جب روہت اور شرت اپنے دوستوں کے ہمراہ رات گئے شرت کے گھر جارہے تھے۔

ایک اور دوست جوزف کا کہنا ہے کہ ہمارا گھر آدھا کلو میٹر دور رہا تھا کہ گاڑی اچانک پڑوسی کے درخت سے جاٹکرائی اور مکمل طور پر تباہ ہوگئی۔

مزید پڑھیں: دبئی میں خوفناک ٹریفک حادثہ، دو پاکستانی سمیت 17 ہلاک

حادثہ اتنا خطرناک تھا کہ دونوں دوست موقع پر ہی دم توڑ گئے، دونوں کے اہلخانہ کا تعلق بھارت کے شہر کیرالہ سے ہے اور دونوں کی فیملیز کافی عرصے سے یو اے ای میں مقیم ہیں۔

دوستوں کا کہنا ہے کہ دونوں بہت ہی ذہین طالب علم تھے، روہت کو شیخ حمدان ایوارڈ سے بھی نوازا گیا تھا، اچانک حادثے کی خبر سن کر دونوں کے اہلخانہ شدت غم سے نڈھال ہیں۔

رپورٹ کے مطابق دونوں دوستوں نے ابتدائی تعلیم دہلی پرائیویٹ اسکول سے حاصل کی تھی، جمعرات کے روز دونوں لڑکوں کو آخری رسومات کے لیے بھارت منتقل کیا جائے گا۔

Comments

یہ بھی پڑھیں