راولپنڈی : پاک ایران بارڈر پر دہشت گردوں کے سیکیورٹی فورسز پر حملے کے نتیجے میں 2 جوان شہید ہوگئے۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ پاک ایران بارڈرپر بلوچستان کے علاقے سنگوان میں دہشت گردوں نے سیکیورٹی فورسز پر فائرنگ کردی۔
آئی ایس پی آر کا کہنا تھا کہ فائرنگ کے شدید تبادلے کے بعد سیکیورٹی فورسز نے دہشتگردوں کو پیچھے دھکیل دیا اور سیکیورٹی فورسزکی فوری جوابی کارروائی نے دہشت گردوں کاحملہ پسپاکردیا۔
ترجمان نے کہا کہ فائرنگ کےتبادلےمیں سپاہی حسنین اشتیاق اورسپاہی عنایت اللہ شہید ہوگئے تاہم سیکیورٹی فورسزکاعلاقےمیں دہشت گردوں کی ممکنہ تلاش کیلئے آپریشن جاری ہے۔
سیکیورٹی فورسز نے ایرانی حکام سے رابطہ کرکے دہشت گردوں کو روکنے کے حوالے سے بات چیت کی اور علاقے میں فوری طور پر آپریشن شروع کردیا گیا ہے۔
آئی ایس پی آر کا کہنا ہے کہ بلوچستان میں امن کی کوششوں کو سبوتاژ کرنے کی اجازت نہیں دی جاسکتی۔
