دبئی: متحدہ عرب امارات کی تمام ریاستوں میں گاڑیوں کی حد رفتار یکساں طور پر مقرر کرنے کی تجویز زیر غور ہے، رواں سال ٹریفک حادثات میں 8 فیصد کمی نوٹ کی گئی ہے۔
فیڈرل ٹریفک کونسل کے ڈائریکٹر جنرل میجر جنرل محمد سیف نے کہا ہے کہ تمام ریاستوں کے ٹریفک ڈیپارٹمنٹس کے ڈائریکٹرز اور متعلق دیگر محکموں کے اعلیٰ حکام تجویز کو قابل عمل بنانے کے لیے سر جوڑ کر بیٹھ گئے ہیں۔
عرب میڈیا کے مطابق اس حوالے سے غور کیا جارہا ہے کہ یکساں حد رفتار کرنا کس حد تک ممکن ہے اور یہ کہ مملکت کی تمام ریاستوں پر سے اسپیڈ مارجن کی رعایت موجود ہونی چاہئے یا پھر اسے مکمل طور پر ختم کردیا جائے۔
دوسری جانب موجودہ اعدادوشمار کا جائزہ لیا جارہا ہے کہ حد رفتار میں کمی لانے سے ٹریفک حادثات میں کمی لائی جاسکتی ہے یا نہیں، دبئی میں تمام سڑکوں پر مقرر کردہ حد رفتار سے 20 کلو میٹر فی گھنٹہ تک تجاوز کرنے کی رعایت موجود ہے۔
ابوظہبی میں یہ رعایت گزشتہ ماہ ختم کردی گئی تھی جس کے باعث جو حد رفتار مخصوص ہے اس سے ایک کلو میٹر تجاوز کرنے پر بھی جرمانے کا سامنا کرنا پڑتا ہے۔
ٹریفک کونسل کے ممبران کو دی جانے والی بریفنگ میں بتایا گیا ہے کہ جنوری 2018 سے 26 اگست 2018 تک کے اعدادو شمار کے مطابق ٹریفک حادثات میں ماضی کی نسبت 8 فیصد کمی آئی ہے، اس کا بڑا سبب عوام میں ٹریفک قوانین کی پابندی کا شعور اجاگر کرنے کے لیے شروع کی گئی مہم ہیں۔
