متحدہ عرب امارات نے دنیا بھر کے شہریوں کے لیے 5 سالہ ملٹی پل سیاحتی ویزے کے اجرا کو مزید آسان بنانے کا اعلان کیا ہے۔
متحدہ عرب امارات نے تمام ممالک کے شہریوں کیلیے 5 سالہ ملٹی پل سیاحتی ویزے کے اجرا کو مزید آسان بناتے ہوئے اس کے لیے کسی اسپانسر یا اندرون ملک میزبان کی شرط ختم کردی ہے جب کہ دیگر چار شرائط عائد کی ہیں جن پر آئندہ ماہ 3 اکتوبر سے عملدرآمد شروع کیا جائے گا۔
عرب میڈیا کے مطابق ملٹی پل سیاحتی ویزے کے خواہشمند افراد کو درخواست دیتے وقت 4 ہزار ڈالر بیلنس کا بینک اسٹیٹمنٹ دینا ہوگا اور یہ اسٹیٹمنٹ ویزے کے حصول کی درخواست دینے کی تاریخ سے 6 ماہ پہلے تک کا ہونا چاہیے، اس کے ساتھ ویزا فیس، مالیاتی گارنٹی اور ہیلتھ انشورنس اسکیم بھی ضروری ہوگی۔
اس کے علاوہ ویزا لینے والے کو اپنے امارات آمد کا مقصد بتانا ہوگا اور اس کو کسی بھی صورت ایک سال سے زیادہ قیام کی اجازت نہیں ہوگی۔
نئی شرائط کے ستھ 5 سالہ سیاحتی ویزا لینے والے کو متعدد سہولتیں اور رعایتیں بھی فراہم کی جائیں گی جس کے تحت ویزا ہولڈر 90 دن تک مسلسل امارات میں قیام کرسکے گا جب کہ اس میں مزید 90 روز کی توسیع بھی ہوسکتی ہے، تاہم اس سے قبل امارات میں قیام کی کل مدت ایک سال می 180 دن سے زیادہ نہ رہی ہو۔
اس حوالے سے اماراتی حکام نے کہا ہے کہ سیاحتی ویزے کی درخواست سے قبل امیدوار اس بات کا اطمینان کرلیں کہ وہ ایسے ملک کا شہری تو نہیں ہے جس کو یو اے ای آنے کے لیے ویزا نہیں لینا پڑتا۔
