ابوظبی: متحدہ عرب امارات میں دفتری اوقات کار میں کمی کر دی گئی ہے، اب یو اے ای میں جمعہ کو آدھی چھٹی ہوگی اور ہفتہ، اتوار کو پوری چھٹی ہوگی۔
تفصیلات کے مطابق متحدہ عرب امارات نے ہفتہ اور اتوار کو باضابطہ ویک اینڈ کے طور پر مان لیا ہے، نئے ویک اینڈ کا اطلاق یکم جنوری سے ہوگا۔
متحدہ عرب امارات نے اپنی معیشت کو عالمی منڈیوں کے ساتھ بہتر طریقے سے ہم آہنگ کرنے کے لیے یہ اقدام اٹھایا ہے، اور اگلے سال کے آغاز سے یو اے ای میں ہفتہ اور اتوار کی چھٹی کے ساتھ ساڑھے چار دن کا ورکنگ ہفتہ ہوگا، یعنی جمعہ کی سہ پہر سے ویک اینڈ کا آغاز ہوگا اور ہفتہ اور اتوار تک رہے گا۔
واضح رہے کہ یو اے ای عرب ممالک کا پہلا ملک ہے جہاں پانچ روز کی بجائے ساڑھے چار روزہ ورکنگ ویک ہوگا، پندرہ برس قبل یو اے ای میں جمعرات اور جمعہ کو وینک اینڈ کی چھٹی ہوتی تھی، پھر 2006 میں جمعہ اور ہفتے کو ویکلی آف کر دیا گیا تھا۔
اب یو اے ای میں پیر سے جمعرات تک سرکاری کام کے اوقات صبح 7:30 بجے سے سہ پہر 3:30 بجے تک ہوں گے، جب کہ جمعہ 4.5 گھنٹے کا دن ہوگا، اور صبح 7:30 بجے سے دوپہر 12 بجے تک اوقات کار ہوں گے۔
