اسلام آباد: برطانوی حکومت نے کرونا وائرس کے پیش نظر پاکستان کے لیے مزید امداد کا اعلان کردیا۔
اے آر وائی نیوز کی رپورٹ کے مطابق برطانوی حکومت نے کرونا وائرس سے نمٹنے کے لیے پاکستان کے لیے 4.39 ملین پاؤنڈز امداد کا اعلان کردیا۔
برطانوی ہائی کمشنر کرسچئین ٹرنر نے کہا کہ پاکستان نے کرونا کے مقابلے میں لیڈر شپ کا مظاہرہ کیا، پاکستان نے معیشت کے ساتھ ضرورت مندوں کا بھی خیال رکھا۔
برطانوی ہائی کمشنر نے سماجی رابطے کی ویب سائٹ ٹویٹر پر اردو میں اپنے پیغام میں کہا کہ ’ہماری مضبوط دوستی کی نشانی کے طور پر آج پاکستان میں کرونا وائرس سے جنگ اور ضرورت مندوں کی مدد کے لیے برطانیہ 4.39 ملین پاؤنڈ کی امداد کا اعلان کررہا ہے۔
🇵🇰 is showing international leadership in its Coronavirus response; 🇬🇧 announces £4.39m of further support cc @Unicef_Pakistan, @UN_Women @zfrmrza @ForeignOfficePk pic.twitter.com/FL1x73AT4F
— Christian Turner (@CTurnerFCO) May 29, 2020
کرسچئین ٹرنر نے مزید کہا کہ پاکستان نے کرونا وائرس کے مقابلے میں بین الاقوامی لیڈر شپ کا مظاہرہ کیا ہے، پاکستان نے کرونا کے دوران ضرورت مندوں کی مدد کے ساتھ ساتھ سب کی صحت کا بھی خیال رکھا ہے۔
واضح رہے کہ گزشتہ ماہ 28 اپریل کو بھی برطانوی حکومت نے کرونا وائرس سے نمٹنے کے لیے پاکستان کے لیے 26 لاکھ 70 ہزار پاؤنڈ کی امداد کا اعلان کیا تھا۔
یاد رہے کہ پاکستان میں کرونا وائرس سے 24 گھنٹوں میں مزید 57 افراد انتقال کرگئے جس کے بعد اموات کی تعداد 1317 ہوگئی ہے۔
