لندن: برطانیہ میں ڈاکٹرز کی جانب سے برطانوی تاریخ کی طویل ترین ہڑتال کا اعلان کیا گیا ہے۔
تفصیلات کے مطابق برطانیہ میں نیشنل ہیلتھ سروسز مشکلات کا شکار ہو گئی ہیں، ڈاکٹروں نے طویل ترین ہڑتال کا اعلان کر دیا ہے، جس کی وجہ سے ہزاروں آپریشنز ملتوی کر دیے گئے ہیں۔
برطانوی میڈیا رپورٹس کے مطابق نیشنل ہیلتھ سروسز کو درپیش مشکلات کے سبب جونیئر ڈاکٹرز 13 سے 18 جولائی تک ہڑتال کریں گے، جب کہ میڈیکل کنسلٹنٹس نے بھی 20 اور 21 جولائی کو ہڑتال کرنے کا اعلان کر دیا ہے، اور ریڈیوگرافرز کی اکثریت بھی ہڑتال میں شامل ہوگی۔
ڈاکٹرز نے تنخواہوں میں 5 فی صد اضافہ مسترد کر دیا ہے، اور تنخواہیں 35 فی صد تک بڑھانے کا مطالبہ کیا ہے، ہڑتال کے باعث برطانیہ بھر میں ہزاروں آپریشنز ملتوی کر دیے گئے ہیں۔
سربراہ نیشنل ہیلتھ سروسز کا کہنا ہے کہ ہڑتالوں میں سب سے زیادہ نقصان مریضوں کا ہو رہا ہے، جس کی وجہ سے مریضوں کو علاج معالجے میں مشکلات کا سامنا ہے، امانڈہ پرچرڈ نے کہا کہ دوران ہڑتال ڈاکٹروں کا متبادل مہیا کرنا نا ممکن ہے۔
