لندن : برطانیہ میں افراط زر کی شرح میں نمایاں کمی سامنے آئی ہے، برطانوی قومی ادارہ شماریات کے مطابق افراط زر گزشتہ دو سالوں میں سب سے کم ترین شرح پر ہے۔
برطانیہ کے دفتر برائے قومی شماریات نے بتایا ہے کہ مذکورہ شرح نومبر سے 3.9 فیصد تک گرگئی ہے، مہنگائی میں گراوٹ کا بڑا عنصر پیٹرول اور ڈیزل کی اوسط قیمتوں میں کمی ہے۔
غیرملکی خبر رساں ادارے روئٹرز کی رپورٹ کے مطابق سالانہ شرح اکتوبر میں 4.6 فیصد سے کم ہو کر 3.9 فیصد رہ گئی ہے جو پیٹرول سستا ہونے کی وجہ سے ستمبر 2021 کے بعد سب سے نیچے چلی گئی تھی۔
ماہرین اقتصادیات نے رواں ماہ کے لیے افراط زر کی شرح 4.4 فیصد تک کم ہونے کی پیش گوئی کی تھی، جو اکتوبر 2023 میں 4.6 فیصد تھی۔
واضح رہے کہ اکتوبر 2022 میں مہنگائی 11.1 فیصد کی 41 سال کی بلند ترین سطح پر پہنچ گئی تھی جو کہ یوکرین روس جنگ کے بعد توانائی کی قیمتوں میں اضافے کی وجہ سے ہوئی۔
