برطانیہ نے بار بار اسلحے کی درخواست پر یوکرین کو کرارا جواب دیا ہے کہا کہ ’ ہم کوئی ایمازون نہیں ہیں۔
غیر ملکی میڈیا کے مطابق اسلحے کے مطالبے پر برطانوی سیکرٹری دفاع بین والس نے ایک بیان میں کہا کہ مغربی امداد کے بدلے یوکرین کو ہمارا احسان مند ہونا چاہیے اور اس چیز کو سمجھنا چاہیے کہ ان کے اتحادی ممالک کے بھی اپنے اندرونی معاملات ہیں۔
یوکرین کی جانب سے بار بار اسلحے کی درخواست پر سیکرٹری دفاع بین والس کا کہنا تھا کیف اتحادیوں سے اسلحے کے اسٹاک کا ذخیرہ مانگ رہا ہے، ہم کوئی ایمازون نہیں ہیں۔
برطانوی سیکریٹری دفاع کا کہنا تھا کہ یوکرین کو یہ بھی سمجھنا چاہیے کہ اتحادی ممالک کے اپنے بھی اندرونی معاملات ہیں، برطانیہ اور اتحادی ایموزون کا ڈیلیوری سسٹم نہیں جو یوکرین کو اسلحہ فراہم کرتا رہے۔
دوسری جانب برطانیہ کے سیکرٹری دفاع بین والس کے حالیہ بیان پر ردعمل دیتے ہوئے یوکرین کے صدر ولودومیر زیلنسکی کا کہنا تھا ہم برطانوی عوام کے شکر گزار ہیں کیونکہ وہاں کے عوام نے ہمیشہ یوکرین کی حمایت کی۔
یوکرینی صدر نے کہا کہ مجھے نہیں معلوم کہ بین والس کے حالیہ بیان کا کیا مطلب ہے، انہیں چاہیے کہ وہ اس حوالے سے مجھے تحریری طور پر لکھیں اور بتائیں کہ وہ کس طرح سے ہمیں اپنا احسان مند دیکھنا چاہتے ہیں۔
اس کے علاوہ برطانوی وزیر اعظم رشی سونک نے برطانیہ کے سیکرٹری دفاع بین والس سے خود کو علیحدہ رکھتے ہوئے کہا کہ یوکرین کے صدر ہمیشہ شکر گزار رہے ہیں۔
