اسلام آباد: پاک یوکرین تعلقات کے قیام کے 30 سال بعد یوکرینی وزیر خارجہ پاکستان کے دورے پر اسلام آباد پہنچ گئے ہیں، دفتر خارجہ آمد پر وزیر خارجہ بلاول بھٹو زرداری نے ان کا استقبال کیا۔
تفصیلات کے مطابق وزیر خارجہ بلاول بھٹو نے وزارت خارجہ آمد پر اپنے یوکرینی ہم منصب دمیتر کولیبا کا استقبال کیا، سفارتی ذرائع کا کہنا ہے کہ دمیترو کولیبا دفتر خارجہ میں یادگار کے طور پر پودا بھی لگائیں گے۔
سفارتی ذرائع کے مطابق پاکستان اور یوکرین کے درمیان وفود کے سطح پر مذاکرات ہوں گے، تجارت، سرمایہ کاری، زراعت اور اعلیٰ تعلیم کے شعبوں میں تعاون کے فروغ کا جائزہ لیا جائے گا۔
مذاکرات کے دوران روس یوکرین جنگ سمیت اہم عالمی و علاقائی امور بھی زیر غور آنے کی توقع ہے، مذاکرات کے بعد یوکرینی وزیر خارجہ اور بلاول بھٹو مشترکہ پریس کانفرنس کریں گے، دمیترو کولیبا وزیر اعظم شہباز شریف سے بھی ملاقات کریں گے۔
واضح رہے کہ دمیترو کولیبا پاک یوکرین تعلقات قائم ہونے کے بعد سے پاکستان کا دورہ کرنے والے پہلے یوکرینی وزیر خارجہ ہیں، پاکستان اور یوکرین کے درمیان 1993 میں سفارتی تعلقات قائم ہوئے تھے۔
