طبی ماہرین نے الٹرا پروسیسڈ فوڈز شوق سے کھانے والوں کو کینسر کے بڑے خطرے سے خبردار کیا ہے۔
لندن کے امپیریل کالج کی ایک تحقیق میں یہ بات سامنے آئی ہے کہ اگر الٹرا پروسیسڈ کھانوں کا استعمال طویل عرصے تک کیا جائے تو جسم میں کینسر کا خطرہ بڑھ سکتا ہے۔
الٹرا پروسیسڈ کھانوں میں پانی کی مقدار کم اور چینی کی مقدار ضرورت سے زیادہ ہوتی ہے، ایسی اشیا کھانے سے پیٹ تو بھر جاتا ہے لیکن وزن میں تیزی سے اضافہ ہوتا ہے۔
طبی ماہرین کا کہنا ہے کہ الٹرا پروسیسڈ فوڈز کو خوراک میں شامل کرنا صحت کے لیے سب سے زیادہ خطرناک ہے۔
الٹرا پروسیسڈ فوڈز کیا ہیں؟
الٹرا پروسیسڈ کھانوں کو کاسمیٹک فوڈز کے نام سے بھی جانا جاتا ہے، یہ فوڈز کئی مراحل سے گزرتے ہیں، اور اس دوران ان میں سے تمام قسم کے اچھے عناصر ختم ہو جاتے ہیں، یہ دراصل فیکٹری میں بنا ہوا کھانا ہوتا ہے، اور اس میں صرف کیلوری رہ جاتی ہے، اس میں کثیر مقدار میں چینی اور فائبر ہوتے ہیں لیکن پروٹین کی مقدار بہت کم ہوتی ہے۔
الٹرا پروسیسڈ فوڈز میں کیا کیا شامل ہوتا ہے؟
انسٹینٹ نوڈلز اور سوپ
ریڈی ٹو ایٹ میلز
پیکڈ اسنیکس
کولڈ ڈرنکس
کیک، بسکٹ، ڈبا بند مٹھائی
پیزا، پاستا، برگر وغیرہ
کینسر کا خطرہ
لندن کے امپیریل کالج کے ایک مصنف ایزتر ویمس نے اپنی تحقیق میں کہا ہے کہ الٹرا پروسیسڈ فوڈ نہ صرف کینسر کے خطرے کو بڑھاتا ہے بلکہ یہ صحت کے لیے سب سے زیادہ نقصان دہ کھانا بھی ہے، زیادہ تر الٹرا پروسیسڈ فوڈ بچے اور بالغ کھاتے ہیں، جس کی وجہ سے صحت پر بدترین اثرات مستقبل میں نظر آئیں گے۔
ایک تحقیق میں یہ بات بھی سامنے آئی ہے کہ الٹرا پروسیسڈ فوڈ کا تعلق موٹاپے، ٹائپ ٹو ذیابیطس اور قلبی امراض سے بھی ہے، جن میں ہارٹ اسٹروک اور ہارٹ اٹیک جیسے مسائل شامل ہیں۔
Why ultra-processed foods are so bad for you https://t.co/XHMapsMuhW
— TIME (@TIME) January 19, 2023
ای کلینیکل میڈیسن نامی جریدے میں شائع شدہ مقالے کے مطابق محققین کا کہنا ہے کہ الٹرا پروسیسڈ فوڈ کا استعمال رحم کے کینسر اور دماغ کے کینسر کے خطرے کو بڑھاتا ہے، انھوں نے نشان دہی کی کہ کینسر سے مرنے والوں میں سے زیادہ تر میں بیضہ دانی اور چھاتی کے کینسر سے متاثر تھے۔
ماہرین کا کہنا ہے کہ اگر الٹرا پروسیسڈ فوڈ کی مقدار میں 10 فی صد اضافہ کیا جائے تو کینسر ہونے کا خطرہ تقریباً 2 فی صد تک بڑھ جاتا ہے، ان کھانوں سے رحم کے کینسر کا خطرہ بھی بڑھ جاتا ہے۔
ریسرچ اسٹڈی کے دوران دیکھا گیا کہ الٹرا پروسیسڈ فوڈ کے استعمال میں ہر 10 فی صد اضافے کے بعد کینسر سے ہونے والی اموات میں 6 فی صد کا اضافہ ہوا۔
