نیویارک: اقوام متحدہ میں ہیومن رائٹس کے سربراہ وولکر ترک نے ایران سے مطالبہ کیا ہے کہ فوری طور پر پھانسی کی تمام سزاؤں کو روکا جائے۔
تفصیلات کے مطابق سربراہ ہیومن رائٹس وولکر ترک نے منگل کو ایک بیان میں کہا ہے کہ ایران میں پھانسی کی سزا ریاستی قتل کے مترادف ہے، ایران مظاہروں میں ملوث افراد کو پھانسی کی سزا دے کر انسانی حقوق کے بین الاقوامی قانون کی خلاف ورزی کر رہا ہے۔
روئٹرز کے مطابق وولکر ترک نے کہا پھانسی مجرمانہ طریقہ کار ہے، عوام کو بنیادی حقوق کے استعمال پر سزا دی جا رہی ہے، تاکہ عوام میں خوف پیدا کیا جا سکے۔
یاد رہے کہ ایران میں 16 ستمبر کو کرد خاتون مہسا امینی کی گرفتاری اور زیر حراست ہلاکت کے بعد ردعمل کے طور پر مظاہروں کے سلسلے میں کم از کم 4 افراد کو پھانسی کی سزا دی گئی ہے۔
ایران میں مزید 2 مظاہرین کی پھانسی پر امریکا کا ردعمل
ایران کی عدلیہ کی جانب سے کہا گیا ہے کہ ان افراد کو سیکیورٹی فورسز کے ارکان پر حملہ کرنے کے جرم میں سزا سنائی گئی ہے۔ دوسری طرف اقوام متحدہ میں ہیومن رائٹس گروپ اور دیگر انسانی حقوق کے گروپوں نے اس تیز رفتار عدالتی کارروائی پر تنقید کی ہے۔
ہفتے کے روز 2 افراد کو پھانسی دی گئی ہے اور اس کے بعد سے مزید کو سزائے موت سنائی جا چکی ہے، اقوام متحدہ نے ایک بیان میں کہا کہ انسانی حقوق کے دفتر کو یہ اطلاع ملی ہے کہ مزید 2 افراد کو پھانسی دیے جانے پرعمل درآمد ہونے والا ہے۔
